ஏற்றுமதி நிறுவனங்களுக்கான RoDTEP மற்றும் RoSCTL வரி திருப்பிச் செலுத்தும் திட்டங்களை மத்திய அரசு மாற்றியமைக்க உள்ளது. ஐந்தாண்டுகளுக்கு ₹2 லட்சம் கோடி நிதி தேவைப்படுவதால், இந்த பாலிசி ரிவியூ ஏற்றுமதி நிறுவனங்களின் லாபத்தை நேரடியாக பாதிக்கலாம்.
மத்திய அரசு ஏற்றுமதி ஆதரவு திட்டங்களான RoDTEP (Remission of Duties and Taxes on Exported Products) மற்றும் RoSCTL (Rebate of State and Central Taxes and Levies) ஆகியவற்றை மறுசீரமைப்பு செய்யும் பணிகளில் ஈடுபட்டுள்ளது. இதற்காக வர்த்தக அமைச்சகம் மற்றும் ஜவுளி அமைச்சகத்தின் கீழ் இரண்டு உயர்மட்டக் குழுக்கள் அமைக்கப்பட்டுள்ளன. அடுத்த 5 ஆண்டுகளில் சுமார் ₹2 லட்சம் கோடி நிதி தேவை என்ற கோரிக்கையைத் தொடர்ந்து, இந்த நிதி சுமையை சரியாகக் கையாள அரசு இந்த நடவடிக்கையை எடுத்துள்ளது.
இந்த திட்டங்கள் ஏன் முக்கியம்?
GST-க்குள் வராத மின்சாரம், எரிபொருள் மற்றும் ஸ்டாம்ப் டியூட்டி போன்ற மறைமுக வரிகளை ஏற்றுமதியாளர்களுக்குத் திருப்பி அளிப்பதன் மூலம், சர்வதேச சந்தையில் இந்தியப் பொருட்கள் விலைப் போட்டியில் நிலைத்து நிற்கின்றன. தற்போதுள்ள பொதுவான சலுகை முறையை மாற்றி, தயாரிப்பு வாரியாக உண்மையான வரிச்சுமையைக் கணக்கிடும் துல்லியமான முறையை அரசு கொண்டு வர திட்டமிட்டுள்ளது.
முதலீட்டாளர்கள் ஏன் கவனிக்க வேண்டும்?
ஜவுளி (Textiles), ரசாயனம் (Chemicals) மற்றும் என்ஜினீயரிங் துறை சார்ந்த நிறுவனங்கள் இந்த ரிஃபண்டுகளை நம்பியே செயல்படுகின்றன. ஒருவேளை புதிய கணக்கீட்டு முறையினால் சலுகை விகிதங்கள் குறைந்தால், அந்த நிறுவனங்களின் நெட் ப்ராஃபிட் மார்ஜினில் அழுத்தம் ஏற்பட வாய்ப்புள்ளது.
இந்தத் திட்டங்களின் தற்போதைய காலக்கெடு டிசம்பர் மாதத்துடன் முடிவடைய உள்ளதால், அரசின் புதிய அறிவிப்பு மிக முக்கியமானதாகக் கருதப்படுகிறது. இந்த பாலிசி மாற்றங்கள் ஏற்றுமதி சார்ந்த நிறுவனங்களின் பங்குகளில் எந்த மாதிரியான தாக்கத்தை ஏற்படுத்தும் என்பதை சந்தை உற்று நோக்கி வருகிறது.