2026-ஆம் ஆண்டிற்கான Global Innovation Index தரவரிசையில் இந்தியா தொடர்ந்து **38-வது** இடத்தைத் தக்கவைத்துள்ளது. கீழ்-நடுத்தர வருமானம் கொண்ட நாடுகளில் முதலிடத்தில் இருந்தாலும், ஆராய்ச்சி மற்றும் மேம்பாட்டு (R&D) செலவினங்களில் உள்ள பற்றாக்குறை நீண்டகால வளர்ச்சிக்கான சவாலாக பார்க்கப்படுகிறது.
உலக அறிவுசார் சொத்து அமைப்பு (WIPO) வெளியிட்டுள்ள 2026-ஆம் ஆண்டிற்கான Global Innovation Index (GII) பட்டியலில், இந்தியா தனது 38-வது இடத்தை தக்கவைத்துக் கொண்டுள்ளது. பொருளாதார வளர்ச்சி நிலைக்கு ஏற்ப, எதிர்பார்ப்புகளை விடச் சிறப்பான செயல்பாடுகளை வெளிப்படுத்தும் 'Overperformer' நாடாக இந்தியா தொடர்ச்சியாக 16-வது ஆண்டாக இடம்பிடித்திருப்பது குறிப்பிடத்தக்கது.
வளர்ச்சி Vs முதலீடு
இந்தியா 'Innovation Outputs' பிரிவில் உலகளவில் 25-வது இடத்தைப் பிடித்துள்ளது. குறிப்பாக, ICT சேவைகள் ஏற்றுமதியில் முதலிடத்திலும், லேட்-ஸ்டேஜ் வென்ச்சர் கேபிடல் (Late-stage Venture Capital) அளவீட்டில் 4-வது இடத்திலும் உள்ளது. ஆனால், 'Innovation Inputs' பிரிவில் இந்தியா 49-வது இடத்தில் மட்டுமே உள்ளது. அதாவது, குறைந்த வளங்களைக் கொண்டு அதிக பலன்களை இந்தியா உருவாக்குகிறது, ஆனால் அடிப்படை கட்டமைப்பில் இன்னும் பலம் தேவைப்படுகிறது.
முதலீட்டாளர்கள் கவனிக்க வேண்டியவை
இந்தியாவின் தற்போதைய கண்டுபிடிப்புகள் பெரும்பாலும் மென்பொருள் மற்றும் ஸ்டார்ட்அப்களைச் சார்ந்தே உள்ளன. ஆனால், நீண்டகால போட்டித்திறனுக்குத் தேவையான 'Business Sophistication' மற்றும் 'Infrastructure' ஆகிய பிரிவுகளில் முறையே 63 மற்றும் 62-வது இடங்களிலேயே இந்தியா உள்ளது.
முக்கியமாக, இந்தியாவின் மொத்த R&D செலவினம் ஜிடிபியில் (GDP) வெறும் 0.6% மட்டுமே உள்ளது. வளர்ந்த நாடுகளுடன் ஒப்பிடும்போது இது மிகவும் குறைவு. மேலும், மக்கள் தொகையில் ஆராய்ச்சியாளர்களின் எண்ணிக்கை குறைவாக இருப்பது ஒரு பெரும் சவாலாக உள்ளது. பெங்களூரு, டெல்லி, மும்பை, சென்னை போன்ற நகரங்களை மையமாகக் கொண்ட இந்த வளர்ச்சி, இனி வரும் காலங்களில் விவசாயம் மற்றும் உற்பத்தித் துறைகளுக்கும் (Manufacturing) விரிவடைந்தால் மட்டுமே இந்தியாவின் பொருளாதார தரம் அடுத்த கட்டத்திற்குச் செல்லும் என நிபுணர்கள் கருதுகின்றனர்.