ஐரோப்பிய ஒன்றியத்தின் கார்பன் வரியை எதிர்த்து WTO-வில் இந்தியா மூன்றாவது தரப்பு உரிமையை பெற்றுள்ளது. இந்த புதிய வரியால் ஸ்டீல், அலுமினியம் மற்றும் சிமெண்ட் ஏற்றுமதி நிறுவனங்களின் லாப வரம்பு (Profit Margin) பாதிக்கப்படும் அபாயம் ஏற்பட்டுள்ளது.
ஐரோப்பிய ஒன்றியத்தின் கார்பன் பார்டர் அட்ஜஸ்ட்மென்ட் மெக்கானிசம் (CBAM) விதிமுறைக்கு எதிராக உலக வர்த்தக அமைப்பில் (WTO) இந்தியா சட்டரீதியான போராட்டத்தைத் தொடங்கியுள்ளது. அமெரிக்கா மற்றும் சீனா உள்ளிட்ட 17 நாடுகள் அடங்கிய குழுவில் தற்போது இந்தியாவும் இணைந்துள்ளது. இதன் மூலம் WTO விசாரணை குழுவின் முன் தனது வாதங்களை முன்வைக்க இந்தியாவுக்கு வாய்ப்பு கிடைத்துள்ளது.
ஏன் இந்த எதிர்ப்பு?
ஐரோப்பிய ஒன்றியம் தனது நாட்டுக்கு இறக்குமதி செய்யப்படும் ஸ்டீல், அலுமினியம், சிமெண்ட், உரங்கள் மற்றும் ஹைட்ரஜன் ஆகியவற்றின் கார்பன் உமிழ்வுக்காக (Carbon Emissions) கூடுதல் கட்டணத்தை வசூலிக்க திட்டமிட்டுள்ளது. இந்திய நிறுவனங்கள் இந்த கூடுதல் செலவை ஐரோப்பிய வாங்குநர்கள் மீது சுமத்த முடியாவிட்டால், அது அவர்களின் நிகர லாபத்தில் பெரும் சரிவை ஏற்படுத்தும். ஐரோப்பிய உற்பத்தியாளர்களுடன் ஒப்பிடும்போது, இந்தியப் பொருட்களின் விலை போட்டித்திறன் குறைய இது முக்கிய காரணமாக அமையும்.
முதலீட்டாளர்கள் கவனிக்க வேண்டியவை:
- கட்டுப்பாட்டுச் சுமை: வரிகள் மட்டுமின்றி, கடுமையான சரிபார்ப்பு நடைமுறைகள் மற்றும் நிர்வாகச் செலவுகள் (Administrative costs) சிறு நிறுவனங்களுக்குப் பெரும் சவாலாக இருக்கும்.
- அரசு முயற்சி: உடனடி தீர்வாக, 'National Accreditation Board for Certification Bodies' (NABCB) மூலம் சான்றிதழ் பெறுவதை அங்கீகரிக்க ஐரோப்பிய ஒன்றியத்துடன் மத்திய அரசு பேச்சுவார்த்தை நடத்தி வருகிறது. இது வெற்றியடைந்தால், இந்தியாவிலேயே கார்பன் தரவுகளைச் சரிபார்த்து செலவுகளைக் குறைக்க முடியும்.
நீண்ட கால அடிப்படையில், இந்த வரி விதிப்பு ஏற்றுமதி அளவுகளைக் குறைக்க வாய்ப்புள்ளது. இதனால், கார்பன் உமிழ்வு குறைந்த உற்பத்தியை நோக்கி மாறாத நிறுவனங்களின் பங்குகள் முதலீட்டாளர்களுக்கு ரிஸ்க்காக அமையக்கூடும்.