வருமான வரித் துறையின் இ-ஃபைலிங் போர்ட்டலில் Section 148 ரீ-அசெஸ்மென்ட் நோட்டீஸை அப்லோட் செய்வதை மட்டும் வைத்து, அது முறைப்படி வழங்கப்பட்டதாகக் கருத முடியாது என்று பெங்களூரு ITAT தீர்ப்பளித்துள்ளது.
பெங்களூரு வருமான வரி மேல்முறையீட்டு தீர்ப்பாயம் (ITAT) வரி தொடர்பான நடைமுறைகளில் ஒரு முக்கியமான தீர்ப்பை வழங்கியுள்ளது. டிஜிட்டல் வசதிகள் என்ற பெயரில், சட்டப்பூர்வமான நோட்டீஸ் வழங்கும் முறையைத் தவிர்க்க முடியாது என தீர்ப்பாயம் தெளிவுபடுத்தியுள்ளது. அதாவது, வருமான வரி சட்டத்தின் பிரிவு 148-ன் கீழ் அனுப்பப்படும் நோட்டீஸை, இ-ஃபைலிங் போர்ட்டலில் மட்டும் பதிவேற்றம் செய்தால் அது முறையாக வழங்கப்பட்டதாகச் சட்டப்படி எடுத்துக்கொள்ளப்படாது.
இந்தத் தீர்ப்பு 2015-16 மதிப்பீட்டு ஆண்டிற்கான ₹1.14 கோடி மதிப்பிலான ரொக்க வைப்பு (Cash Deposit) தொடர்பான வழக்கின் பின்னணியில் வந்துள்ளது. வருமான வரித் துறை அந்த நோட்டீஸை போர்ட்டலில் உருவாக்கியிருந்தாலும், மின்னஞ்சல் அல்லது எஸ்எம்எஸ் (SMS) மூலம் வரி செலுத்துபவருக்கு முறையான அறிவிப்பு சென்றதை அவர்களால் நிரூபிக்க முடியவில்லை. உரிய அறிவிப்பு வழங்கப்படவில்லை என்பதால், அந்த ரீ-அசெஸ்மென்ட் உத்தரவு முழுவதுமாக செல்லாது என ITAT அறிவித்தது.
வருமான வரித் துறை டிஜிட்டல் மயமாகிவிட்டாலும், வரி செலுத்துபவர்களுக்கு அந்தத் தகவல் சென்றடைவதை உறுதி செய்ய வேண்டிய கட்டாயப் பொறுப்பு வரித் துறைக்கே உள்ளது. வெறும் போர்ட்டல் லாக் (Portal Log) மட்டும் போதாது, முறையான டிஜிட்டல் கம்யூனிகேஷன் அவசியமானது.
இந்தத் தீர்ப்பு வரி செலுத்துபவர்களுக்கு ஒரு பாதுகாப்பு கவசமாக இருக்கும். முக்கியமாக, காலக்கெடு நெருங்கும் சமயங்களில் வரும் நோட்டீஸ்களை கவனமாகக் கையாள வேண்டும். போர்ட்டலில் வரும் நோட்டீஸ்களுக்குப் பதிவு செய்யப்பட்ட இமெயில் அல்லது போன் எண்ணிற்குத் தகவல் வந்துள்ளதா என்பதைச் சரிபார்ப்பது அவசியம். வருமான வரித் துறை முறையான அறிவிப்பை அனுப்பத் தவறினால், அந்த நோட்டீஸை சட்டப்படி எதிர்க்க முடியும் என்பதே இந்தத் தீர்ப்பின் சாராம்சம்.