IIT Madras-ன் Centre for Responsible AI வெளியிட்ட புதிய அறிக்கை, AI-ஆல் ஐடி, பிபிஓ (BPO) மற்றும் நிதித்துறையில் ஆரம்பநிலை வேலைகள் (Entry-level roles) பாதிப்படையக்கூடும் என்று எச்சரிக்கிறது.
செயற்கை நுண்ணறிவு (AI) தொழில்நுட்பம் இந்திய கார்ப்பரேட் உலகில் மிக வேகமாக ஊடுருவி வரும் சூழலில், ஐஐடி மெட்ராஸ் (IIT Madras) வெளியிட்ட புதிய வெள்ளை அறிக்கை பல முக்கிய கேள்விகளை எழுப்பியுள்ளது. வழக்கமான பணிகளை AI இயந்திரங்கள் எடுத்துக்கொள்வது, நீண்டகாலமாக இந்திய பணியாளர் சந்தைக்கு முதுகெலும்பாக இருந்த 'அப்ரண்டிஸ்' (Apprenticeship) முறையை சிதைக்கக்கூடும் என இந்த அறிக்கை சுட்டிக்காட்டுகிறது.
எங்கே ஆபத்து?
IT, BPO மற்றும் நிதி நிறுவனங்கள், ஜூனியர் பணியாளர்களை வைத்துத்தான் பெரும் வணிக வளர்ச்சியை (Business Scale) கட்டமைக்கின்றன. ஆரம்பநிலை வேலைகளில் சேரும் இளைஞர்கள், அந்தப் பணிகளின் மூலம் அனுபவத்தைப் பெற்று, பிற்காலத்தில் மேலாளர்களாக உயர்கின்றனர். ஆனால், இந்த ஆரம்பகட்டப் பணிகளை AI கையகப்படுத்தினால், வருங்காலத் தலைவர்களை உருவாக்கும் சூழல் இல்லாமல் போய்விடும் என்ற அச்சம் எழுந்துள்ளது.
முதலீட்டாளர்கள் என்ன கவனிக்க வேண்டும்?
முதலீட்டாளர்களைப் பொறுத்தவரை, இது ஒரு Long-term operational risk. AI-ன் மூலம் செலவு குறைந்தாலும், அனுபவமுள்ள மேலாளர்களுக்குப் பற்றாக்குறை ஏற்படும் அபாயம் உள்ளது. இதைத் தவிர்க்க, நிறுவனங்கள் தங்கள் ஊழியர்களுக்குத் தகுந்த Reskilling மற்றும் Training திட்டங்களில் அதிக முதலீடு செய்ய வேண்டியிருக்கும். இந்த கூடுதல் செலவுகள் நிறுவனங்களின் Profit Margins-ஐ பாதிக்கக்கூடும் என்பதால், நிறுவனங்களின் வருங்கால பட்ஜெட் திட்டங்களை கவனிப்பது அவசியம்.
தொழில்நுட்பத்தோடு மனிதர்களின் முடிவெடுக்கும் திறனையும் இணைத்து, ஜூனியர் பணியாளர்களை உயர் மதிப்புள்ள பணிகளுக்கு மாற்றும் நிறுவனங்களே நீண்டகால வெற்றி பெறும். நிறுவனங்களின் இந்த 'HR' மாற்றங்களை இனிவரும் காலாண்டுகளில் முதலீட்டாளர்கள் உன்னிப்பாகக் கவனிக்க வேண்டும்.