இந்தியாவின் சிறு மற்றும் நடுத்தர நிறுவனங்களின் (SME) வளர்ச்சியை ஊக்குவிக்க மத்திய அமைச்சரவை ரூ.10,000 கோடி மதிப்பிலான புதிய நிதியை ஒதுக்கீடு செய்துள்ளது. இனி கடனாக அல்லாமல், பங்கு முதலீடாக (Equity Capital) இந்த நிதி வழங்கப்பட உள்ளது.
மத்திய அமைச்சரவை இந்த ₹10,000 கோடி மதிப்பிலான SME Growth Fund திட்டத்திற்கு ஒப்புதல் அளித்துள்ளது. 2026-27 மத்திய பட்ஜெட்டில் அறிவிக்கப்பட்ட இந்த திட்டம், தற்போது செயல்பாட்டிற்கு வருகிறது. வங்கிக் கடன்களை நம்பியிருக்கும் நிலையை மாற்றி, நிறுவனங்களுக்கு பங்கு முதலீடாக இந்த நிதியை வழங்குவதன் மூலம், தொழில் முனைவோர் மாதந்தோறும் வட்டி கட்ட வேண்டிய அவசியமில்லை.
'Missing Middle' பிரிவினருக்கு முன்னுரிமை
இந்தியாவில் பல சிறு நிறுவனங்கள் வளர்ச்சிக்கான ஒரு இக்கட்டான கட்டத்தில் உள்ளன. மைக்ரோ நிறுவனங்களை விட பெரியதாகவும், ஆனால் பொது சந்தையில் பெரிய முதலீடுகளை ஈர்க்க முடியாத சிறிய நிறுவனங்களாகவும் இவை உள்ளன. இந்த 'Missing Middle' பிரிவினரை மையப்படுத்தி, குறிப்பாக Tier II மற்றும் Tier III நகரங்களில் உள்ள தொழிற்சாலைகளுக்கு இந்த நிதி முக்கிய ஊக்கமாக அமையும்.
பேலன்ஸ் ஷீட்டில் ஏற்படும் மாற்றம்
வளர்ச்சிக்காக கடன் வாங்குவது SME நிறுவனங்களுக்கு ஆபத்தானதாக அமையலாம். லாபம் வருகிறதோ இல்லையோ, கடனுக்கான வட்டி மற்றும் அசலை திருப்பி செலுத்த வேண்டிய அழுத்தம் இருக்கும். ஆனால், அரசாங்கம் பங்குதாரராக (Equity Partner) முதலீடு செய்வதால், அந்த பணம் நிறுவனத்தின் தொழில்நுட்பம் மற்றும் இயந்திரங்களை மேம்படுத்த உதவும். ஒருவேளை தொழில் சவால்களை சந்தித்தால் கூட, அசலை திரும்ப செலுத்த வேண்டிய கட்டாயம் இல்லாததால், இது நிறுவனங்களுக்கு ஒரு பெரிய பாதுகாப்பு கவசமாக இருக்கும்.
சர்வதேச சந்தையை குறிவைக்கும் உற்பத்தி
இந்தத் திட்டம் அனைத்து சிறு நிறுவனங்களுக்கும் அல்ல. உலகளாவிய சப்ளை செயினுடன் (Global Supply Chain) இணையும் திறன் கொண்ட உற்பத்தி நிறுவனங்களுக்குத்தான் முன்னுரிமை. இந்தியாவின் GDP-ல் உற்பத்தியின் பங்கை அதிகரிக்க இது ஒரு முக்கிய உத்தியாக பார்க்கப்படுகிறது. கடந்த 2020-ல் கொண்டுவரப்பட்ட 'Self-Reliant India Fund' திட்டத்தின் நீட்சியாகவே இது கருதப்படுகிறது.
கவனிக்க வேண்டிய சவால்கள்
நிதியை வழங்குவதை விட, எந்த நிறுவனங்களுக்கு இந்த நிதி சென்றடைய வேண்டும் என்பதைத் தேர்ந்தெடுப்பதுதான் மிகப்பெரிய சவால். சரியான மேலாண்மை இல்லாத அல்லது சந்தை வாய்ப்பு குறைவான நிறுவனங்களில் இந்த நிதி முடங்கிவிட வாய்ப்புள்ளது. மேலும், கச்சாப் பொருட்களின் விலை உயர்வு, சர்வதேச அளவில் மந்தமான தேவை போன்ற காரணிகள் இந்த நிறுவனங்களின் செயல்பாட்டை பாதிக்கலாம். இறுதி வழிகாட்டுதல்கள் மற்றும் நிதி மேலாளர்கள் (Fund Managers) யார் என்பது குறித்த அறிவிப்புகளே, இந்தத் திட்டத்தின் வெற்றியை தீர்மானிக்கும்.