Google போன்ற நிறுவனங்களுக்கு ஐரோப்பிய யூனியன் விதிக்கும் Antitrust அபராதத் தொகையை, உறுப்பு நாடுகளின் பட்ஜெட் பங்களிப்பைக் குறைக்கப் பயன்படுத்த வேண்டும் என்று பிரான்ஸ் கோரிக்கை விடுத்துள்ளது.
ஐரோப்பிய யூனியன் (EU) சட்ட விரோத வர்த்தக நடைமுறைகளுக்காக (Antitrust) வசூலிக்கும் கோடிக்கணக்கான தொகையை, எப்படிப் பயன்படுத்தலாம் என்பதில் புதிய விவாதத்தை பிரான்ஸ் தொடங்கியுள்ளது. ஐரோப்பிய அமைச்சர் பெஞ்சமின் ஹடாட் தலைமையிலான இந்த முயற்சி, அந்தந்த உறுப்பு நாடுகள் ஐரோப்பிய யூனியனுக்குச் செலுத்தும் கட்டாய பங்களிப்புத் தொகையை (Budget Contributions) குறைக்கும் நோக்கம் கொண்டது.
பட்ஜெட் சுமை மற்றும் நிதியியல் நெருக்கடி
இந்தத் திட்டம் 2028-2034 நிதிநிலை வரைவு குறித்த பேச்சுவார்த்தைகளின் போது முன்வைக்கப்பட்டுள்ளது. ஐரோப்பிய கமிஷன் சுமார் €2 டிரில்லியன் மதிப்பிலான நிதி கட்டமைப்பை முன்மொழிந்துள்ளது. இதில் கொரோனா கால மீட்பு நிதிக்கான கடன் வட்டி மட்டுமே €168 பில்லியன் ஆகும். இந்த நிதியைச் சமாளிக்க உறுப்பு நாடுகள் திணறி வரும் நிலையில், அபராதத் தொகையை பட்ஜெட்டுக்கு ஈடுசெய்வது ஒரு தீர்வாக அமையும் என பிரான்ஸ் கருதுகிறது.
டெக் நிறுவனங்களுக்கு சிக்கல் அதிகரிக்குமா?
Alphabet நிறுவனத்தின் Google, கடந்த இரண்டு தசாப்தங்களில் ஐரோப்பிய யூனியனிடம் சுமார் €10.38 பில்லியன் அளவிற்கு அபராதங்களைச் சந்தித்துள்ளது. இந்த ஆண்டு மட்டும் €890 மில்லியன் அபராதம் விதிக்கப்பட்டுள்ளது. தற்போது இந்தத் தொகை பொது வருவாயாகக் கருதப்படுகிறது. ஆனால், இதை நாடுகளின் கணக்கில் வரவு வைக்கும் திட்டத்தினால், எதிர்காலத்தில் அபராதத் தொகைகளை வசூலிப்பதில் ஐரோப்பிய யூனியன் இன்னும் தீவிரமாகச் செயல்பட வாய்ப்புள்ளது.
இந்த நடைமுறை அமலுக்கு வருமா என்பது ஆண்டிறுதிக்குள் தெரியவரும். இருப்பினும், ஐரோப்பிய யூனியனின் இந்த அணுகுமுறை எதிர்காலத்தில் பெரிய டெக் நிறுவனங்களுக்கான முதலீட்டுச் சூழலில் ஒரு முக்கிய மாற்றத்தை ஏற்படுத்தும் என எதிர்பார்க்கப்படுகிறது.