அரசு ஊழியர்களின் சம்பள விவரங்களில் நடக்கும் குளறுபடிகளைத் தவிர்க்க, அவர்கள் ஓய்வு பெறுவதற்கு நான்கு ஆண்டுகளுக்கு முன்பே கட்டாய ஆடிட் நடத்த நிதி அமைச்சகம் உத்தரவிட்டுள்ளது.
நிதி அமைச்சகத்தின் அதிரடி உத்தரவு
அரசு துறைகளில் ஓய்வூதிய பலன்கள் வழங்கப்படுவதில் உள்ள குளறுபடிகளைச் சரிசெய்ய, நிதி அமைச்சகம் ஒரு புதிய வழிகாட்டுதலை வெளியிட்டுள்ளது. இனி அரசு ஊழியர்கள் ஓய்வு பெறுவதற்கு சரியாக 4 ஆண்டுகளுக்கு முன்பே, அவர்களின் சம்பளப் பதிவுகள் மற்றும் ஓய்வூதிய ஆவணங்கள் முழுமையாக தணிக்கை (Audit) செய்யப்பட வேண்டும்.
பொறுப்பு யாருடையது?
இதுவரை ஓய்வுபெற்ற பிறகு அதிகப்படியான பணம் வழங்கப்பட்டதைக் கண்டறிந்து, அதைத் திரும்பப் பெறுவது மிகப்பெரிய சட்டப் போராட்டமாகவே இருந்தது. இனி, அந்தப் பொறுப்பு அந்தந்த துறை சார்ந்த நிர்வாகத்திடம் ஒப்படைக்கப்படுகிறது. தணிக்கை செய்யப்பட்ட பிறகு ஏதேனும் தவறு கண்டறியப்பட்டால், ஓய்வுபெற்ற ஊழியர் மீது எவ்வித நடவடிக்கையும் எடுக்கப்பட மாட்டாது. அதற்குப் பதிலாக, தவறுக்குக் காரணமான சம்பந்தப்பட்ட அலுவலகங்களே முழு பொறுப்பேற்க வேண்டும்.
ஏன் இந்த நடவடிக்கை?
நடப்பு நிதியாண்டில் மட்டும் அரசு ஓய்வூதியத்திற்காகச் செலவிடப்படும் தொகை சுமார் ₹3.46 லட்சம் கோடி. சுமார் 70 லட்சம் ஊழியர்களைக் கொண்ட இவ்வளவு பெரிய அமைப்பில், சின்னச் சின்ன கணக்கீட்டுத் தவறுகள் கூட பெரும் நிதி இழப்பை உண்டாக்குகின்றன. இதைத் தவிர்க்கவும், நீதிமன்ற வழக்குகளைக் குறைக்கவும் மத்திய அரசு இத்தகைய முன்னெச்சரிக்கை நடவடிக்கையை எடுத்துள்ளது.
இந்த புதிய கட்டுப்பாடு, 2021-ஆம் ஆண்டின் மத்திய சிவில் சர்வீசஸ் (பென்ஷன்) விதிகளின் கீழ் கொண்டுவரப்பட்டுள்ளது. இந்த மாற்றமானது அரசு நிதி நிர்வாகத்தை மேம்படுத்த எடுக்கப்பட்ட மிக முக்கியமான நடவடிக்கையாகப் பார்க்கப்படுகிறது.