ஐரோப்பிய ஒன்றியத்தின் அதிரடி முடிவு: அமெரிக்க கட்டணங்களை தவிர்க்க பெரும் நிறுவனங்களுக்கு புதிய வரி விதிப்பு

ஐரோப்பிய ஒன்றியத்தில் (EU) செயல்படும் பெரிய நிறுவனங்களிடம் இருந்து வருவாய் ஈட்ட, புதிய வரி விதிப்பு முறையை அந்நாட்டு ஆணையம் பரிசீலித்து வருகிறது. 'Corporate Resource for Europe' (CORE) என்ற திட்டத்தின் கீழ், இந்த புதிய கட்டமைப்பு மாற்றங்கள் கொண்டு வரப்படுகின்றன. முன்னதாக டிஜிட்டல் சேவை நிறுவனங்களை மட்டுமே குறிவைத்திருந்த ஐரோப்பா, தற்போது புவிசார் அரசியல் பதற்றங்களைக் கருத்தில் கொண்டு அனைத்து பெரிய நிறுவனங்களையும் உள்ளடக்கிய பொதுவான வரி விதிப்புக்கு மாறியுள்ளது.

வரி எவ்வளவு இருக்கும்?

ஐரோப்பிய ஒன்றியத்திற்குள் ஆண்டுக்கு €100 மில்லியனுக்கும் அதிகமான வருமானம் ஈட்டும் நிறுவனங்கள் இந்த புதிய வரி வரம்பிற்குள் வரும். இதன்படி, நிறுவனங்கள் ஆண்டுக்கு €1,00,000 முதல் €7,50,000 வரை ஒரு குறிப்பிட்ட தொகையை கட்டணமாகச் செலுத்த வேண்டியிருக்கும். உலகளாவிய ஜாம்பவான் நிறுவனங்களுக்கு இது சிறிய தொகையாகத் தெரிந்தாலும், ஒட்டுமொத்தமாகப் பார்க்கும்போது ஐரோப்பிய பட்ஜெட்டிற்கு இது பெரிய பலத்தைச் சேர்க்கும்.

அமெரிக்கா உடனான மோதல்

இந்த திடீர் மாற்றத்திற்கு முக்கிய காரணம் அமெரிக்காவுடனான வர்த்தகப் போர் அச்சம் தான். அமெரிக்க நிறுவனங்களை மட்டும் குறிவைத்து வரி விதிக்கப்பட்டால், அதற்குப் பதிலடியாக அமெரிக்கா அதிக இறக்குமதி கட்டணங்களை (Tariffs) விதிக்கும் என அதிபர் டொனால்ட் டிரம்ப் எச்சரித்திருந்தார். எனவே, எந்த ஒரு குறிப்பிட்ட துறையையும் பாகுபாடின்றி அனைத்து பெரிய நிறுவனங்களுக்கும் இந்த வரியை விரிவுபடுத்துவதன் மூலம் அமெரிக்காவின் கண்டனத்தைத் தவிர்க்க ஐரோப்பிய அதிகாரிகள் திட்டமிடுகின்றனர்.

என்னென்ன சவால்கள்?

இந்த வரி திட்டம் நடைமுறைக்கு வருவது அவ்வளவு எளிதல்ல. ஐரோப்பிய ஒன்றியத்தின் அனைத்து உறுப்பு நாடுகளும் இதற்கு ஒருமனதாக ஆதரவு அளிக்க வேண்டும். ஒவ்வொரு நாட்டின் பொருளாதார நலன்கள் வெவ்வேறாக இருப்பதால், இந்த உடன்பாட்டை எட்டுவதில் சிக்கல்கள் உள்ளன. மேலும், இந்த புதிய வரி சுமைகள் அமெரிக்காவுடனான தூதரக உறவில் விரிசலை ஏற்படுத்துமோ என்ற அச்சமும் சில நாடுகளிடம் உள்ளது. இந்த விவகாரம் தற்போது 2028-2034 காலத்திற்கான நிதி கட்டமைப்பு தொடர்பான பேச்சுவார்த்தைகளில் ஒன்றாக உள்ளது.