இந்திய நிறுவனங்கள் வெறும் 'தற்சார்பு' என்ற நிலையையும் தாண்டி, உலகளாவிய விநியோக சங்கிலியில் (Global Supply Chain) தவிர்க்க முடியாத சக்தியாக மாற வேண்டும் என்று தலைமை பொருளாதார ஆலோசகர் V. Anantha Nageswaran வலியுறுத்தியுள்ளார்.
மும்பையில் நடைபெற்ற 13-வது SBI Banking and Economics Conclave-ல் பேசிய தலைமை பொருளாதார ஆலோசகர் V. Anantha Nageswaran, இந்தியாவின் எதிர்கால தொழில் வளர்ச்சி குறித்து முக்கிய கருத்துகளை பகிர்ந்துள்ளார்.
தவிர்க்க முடியாத இந்தியா (Strategic Indispensability)
இந்திய நிறுவனங்கள் இறக்குமதியை குறைக்கும் கொள்கையை தாண்டி, உலக சந்தையே இந்தியாவைச் சார்ந்திருக்கும் அளவுக்கு மிக முக்கியமான தொழில்நுட்பம் மற்றும் உற்பத்தி திறன்களை உருவாக்க வேண்டும் என்று அவர் கூறினார்.
சலுகைகள் வெறும் தாற்காலிகம்
கடந்த சில ஆண்டுகளாக 14 முக்கிய துறைகளுக்கு வழங்கப்பட்டு வரும் Production Linked Incentive (PLI) திட்டங்கள் குறித்து அவர் பேசுகையில், "இந்த மானியங்கள் எப்போதும் உங்களுக்கு ஊன்றுகோலாக இருக்காது. நிறுவனங்கள் தங்கள் செயல்பாட்டுத் திறனை (Operational Efficiency) மேம்படுத்தி, சொந்த காலில் நிற்க பழக வேண்டும்" என எச்சரித்தார்.
கவனிக்க வேண்டிய துறைகள்
தொழிலாளர் பயன்பாடு அதிகம் உள்ள இன்ஜினியரிங், கெமிக்கல் மற்றும் டெக்ஸ்டைல்ஸ் ஆகிய துறைகளுக்கு அதிக முக்கியத்துவம் அளிக்க வேண்டும் என அவர் சுட்டிக்காட்டினார். இவைதான் அதிகப்படியான வேலைவாய்ப்புகளை உருவாக்கும் என்ஜின்களாக இருக்கும்.
AI-ன் தாக்கம் மற்றும் வேலைவாய்ப்பு
செயற்கை நுண்ணறிவின் (AI) வளர்ச்சியால் புதிய பணியாளர்களுக்கான வேலைவாய்ப்புகள் குறையும் அபாயம் உள்ளதாக அவர் கவலை தெரிவித்தார். AI-ஆல் எளிதில் மாற்ற முடியாத உற்பத்தித் துறைகளில் அதிக முதலீடு செய்வதே நீண்டகால பொருளாதார ஸ்திரத்தன்மைக்கு வழிவகுக்கும் என்று அவர் தெரிவித்தார். ஐரோப்பிய ஒன்றியம் மற்றும் இங்கிலாந்துடன் நடைபெற்று வரும் வர்த்தக ஒப்பந்தங்கள் (FTA), இந்திய நிறுவனங்களை சர்வதேச தரத்திற்கு உயர்த்த ஒரு முக்கிய காரணியாக இருக்கும் என்பது குறிப்பிடத்தக்கது.