ஏஐ (AI) உள்கட்டமைப்பிற்காக பெருமளவில் முதலீடு செய்யப்படுவதால் ஏற்படும் பாதிப்புகள் குறித்து முதலீட்டாளர்கள் கவலையடைந்துள்ளனர். இதனால் ஆசிய சந்தைகள் தொடர்ந்து நான்காவது வாரமாக சரிவைச் சந்தித்துள்ளன.
ஆசிய நிதிச் சந்தைகள் கடந்த வெள்ளிக்கிழமை பெரும் வீழ்ச்சியைச் சந்தித்தன. கடந்த 4 வாரங்களாகவே சந்தை தொடர்ந்து சரிவை நோக்கி நகர்ந்து கொண்டிருக்கிறது. இதற்கு முக்கிய காரணம், செயற்கை நுண்ணறிவு (AI) டேட்டா சென்டர்களுக்காக செலவிடப்படும் பில்லியன் கணக்கான டாலர்கள், எதிர்காலத்தில் லாபத்தை ஈட்டித் தருமா என்ற சந்தேகம் முதலீட்டாளர்கள் மத்தியில் எழுந்துள்ளது.
டெக் துறை பங்குகள் சரிவு
Nasdaq-ல் ஏற்பட்டுள்ள அழுத்தம் ஆசிய சந்தைகளையும் விட்டு வைக்கவில்லை. தென்கொரியாவின் KOSPI குறியீடு 1.7% வீழ்ச்சியடைந்தது. அதேபோல, பிரபல சிப் தயாரிப்பு நிறுவனமான SK Hynix பங்குகள் 2.5% சரிந்தன. ஜப்பானின் Nikkei குறியீடு 1.3% குறைந்துள்ளது. அதிக வளர்ச்சியை எதிர்பார்க்கும் டெக் நிறுவனங்களின் பங்குகள் மீதான நம்பிக்கை குறைந்து வருவது தெளிவாக தெரிகிறது.
பாதுகாப்பான முதலீட்டை நோக்கி முதலீட்டாளர்கள்
பங்குச் சந்தையில் நிலவும் நிச்சயமற்ற தன்மையால், முதலீட்டாளர்கள் இப்போது US Treasury பான்டுகளை நோக்கித் திரும்பியுள்ளனர். கடந்த 3 ஆண்டுகளில் இல்லாத அளவிற்கு US Treasury பான்டுகளில் முதலீடு அதிகரித்துள்ளது. இதனால் 10 ஆண்டுகால பான்டு ஈட்டுத்தொகை (Yield) 5% க்கும் கீழே குறைந்துள்ளது. வட்டி விகித உயர்வு குறித்த எதிர்பார்ப்பு குறைந்ததே இதற்கு முதன்மையான காரணம்.
கச்சா எண்ணெய் மற்றும் புவிசார் அரசியல் சூழல்
மத்திய கிழக்கில் நிலவும் பதற்றமான சூழலால், பிரண்ட் கச்சா எண்ணெய் விலை $114 டாலராக உயர்ந்துள்ளது. இது உலகளாவிய விநியோகச் சங்கிலியில் பாதிப்பை ஏற்படுத்தும் என்ற அச்சத்தை அதிகரித்துள்ளது. ஜப்பானிய யென் (Yen) மற்றும் சுவிஸ் பிராங்க் (Swiss Franc) போன்ற பாதுகாப்பான கரன்சிகளின் மதிப்பு வலுவடைந்து வருவது, உலக சந்தையில் முதலீட்டாளர்கள் எவ்வளவு எச்சரிக்கையுடன் இருக்கிறார்கள் என்பதைக் காட்டுகிறது.
இந்திய முதலீட்டாளர்களுக்கு என்ன பாதிப்பு?
இந்திய பங்குச் சந்தை தனது சொந்த அடிப்படைகளைக் கொண்டிருந்தாலும், உலகளாவிய சூழலிலிருந்து தனித்து இருக்க முடியாது. அந்நிய முதலீடுகள் (FII) வெளியேறுவது நம் பங்குச் சந்தையை பாதிக்க வாய்ப்புள்ளது. மேலும், உலகளாவிய டெக் நிறுவனங்களின் மதிப்பீடு குறையும் போது, அதன் தாக்கம் இந்திய ஐடி (IT) நிறுவனங்களின் மீதும் எதிரொலிக்க வாய்ப்புள்ளது. கச்சா எண்ணெய் விலை உயர்வு பணவீக்கத்தை அதிகரித்து, நிறுவனங்களின் லாப வரம்பை (Profit Margins) குறைக்கக்கூடும் என்பதால் முதலீட்டாளர்கள் கவனமாக இருப்பது நல்லது.