16-வது நிதிக் குழுவின் தலைவர் Arvind Panagariya, இந்திய ரூபாய் மதிப்பு குறைவதை ஒரு பொருளாதாரத் தடையாகப் பார்க்காமல், ஏற்றுமதியை ஊக்குவிக்கும் ஒரு கருவியாகப் பயன்படுத்த வேண்டும் என்று யோசனை தெரிவித்துள்ளார்.
இந்தியாவின் 16-வது நிதிக் குழுத் தலைவர் Arvind Panagariya, நாட்டின் அந்நியச் செலாவணி கொள்கையில் அதிரடியான மாற்றத்தை முன்மொழிந்துள்ளார். ரூபாயின் மதிப்பு குறைவதை எப்போதும் ஒரு கெட்ட விஷயமாகப் பார்க்கத் தேவையில்லை என்றும், அதை ஏற்றுமதி சந்தையில் இந்தியா முன்னிலை பெற உதவும் ஒரு உத்தியாகப் பார்க்க வேண்டும் என்றும் அவர் வலியுறுத்துகிறார். குறிப்பாக, டாலருக்கு நிகரான இந்திய ரூபாயின் மதிப்பு ₹100-ஐத் தாண்டிவிடுமோ என்ற அச்சத்தில், மத்திய வங்கி அந்நியச் செலாவணி கையிருப்பை அளவுக்கு அதிகமாகச் செலவழித்து ரூபாயைக் காக்க வேண்டிய அவசியமில்லை என்பது அவர் கருத்து.
ஏற்றுமதியாளர்கள் vs இறக்குமதியாளர்கள்
பொருளாதார விதிகளின்படி, ரூபாய் மதிப்பு குறையும் போது, வெளிநாட்டு வாடிக்கையாளர்களுக்கு இந்தியப் பொருட்கள் மலிவாகக் கிடைக்கும். இது ஐடி (IT), பார்மா (Pharma) மற்றும் டெக்ஸ்டைல்ஸ் போன்ற ஏற்றுமதி சார்ந்துள்ள துறைகளுக்கு அதிக லாபத்தை ஈட்டித் தரும். அதே நேரத்தில், கச்சா பொருட்கள் அல்லது உதிரி பாகங்களை இறக்குமதி செய்யும் நிறுவனங்களுக்கு, உற்பத்திச் செலவு கணிசமாக உயர வாய்ப்புள்ளது. இந்த நிறுவனங்கள் வாடிக்கையாளர்கள் மீது விலையைச் சுமத்த முடியாவிட்டால், அவர்களின் மார்ஜின் பாதிப்படையக்கூடும்.
முதலீட்டாளர்கள் கவனிக்க வேண்டிய ரிஸ்க்குகள்
ரூபாய் மதிப்பு வீழ்ச்சியால் ஏற்படும் மிக முக்கியமான சவால், டாலர் கடன் வைத்துள்ள நிறுவனங்கள் தான். டாலர் கடன் அதிகம் வைத்திருக்கும் நிறுவனங்களுக்கு, கடன் திரும்பச் செலுத்தும் சுமை (Debt Servicing) கூடும். இது அவர்களின் நெட் ப்ராஃபிட்டை நேரடியாக பாதிக்கும். மேலும், இறக்குமதி செய்யப்படும் பொருட்களின் விலை உயர்வதால், இந்தியாவில் பணவீக்கம் (Inflation) அதிகரிக்கவும் வாய்ப்புள்ளது.
கட்டமைப்பு சீர்திருத்தங்கள் அவசியம்
இதுமட்டுமின்றி, உள்நாட்டு நிறுவனங்களுக்கு பாதுகாப்பு அளிக்கும் பெயரில் நடைமுறையில் உள்ள சில கட்டுப்பாடுகள் (QCOs) மற்றும் ஆண்டி-டம்பிங் வரி முறைகளை Panagariya விமர்சித்துள்ளார். இவை திறமையற்ற நிறுவனங்களை ஊக்குவிப்பதாகக் கூறிய அவர், சீனா மற்றும் வியட்நாம் போல இந்தியா சர்வதேச அளவில் போட்டியிட வேண்டுமானால், முதலீட்டு விதிகள் மற்றும் வர்த்தக ஒப்பந்தங்களில் வெளிப்படைத்தன்மை தேவை என்கிறார். இனி வரும் காலங்களில் ரிசர்வ் வங்கியின் நடவடிக்கைகள் மற்றும் அரசின் வர்த்தக கொள்கை முடிவுகளை முதலீட்டாளர்கள் கூர்ந்து கவனிக்க வேண்டும்.