அமெரிக்க விசா சிக்கல்கள் மற்றும் தொழில்நுட்ப நிறுவனங்களில் நடந்து வரும் ஆட்குறைப்பு (Layoffs) காரணமாக, ஜனவரி முதல் செப்டம்பர் 2026 வரை சுமார் **12,700** இந்திய டெக் வல்லுநர்கள் தாயகம் திரும்பியுள்ளனர். இந்த மாற்றமானது இந்திய ஐடி துறை மற்றும் Global Capability Centres (GCC) ஆகியவற்றில் புதிய தாக்கங்களை ஏற்படுத்தியுள்ளது.
அமெரிக்காவில் நிலவும் விசா நிச்சயமற்ற தன்மை மற்றும் தொழில்நுட்ப துறையில் நீடிக்கும் ஆட்குறைப்பு நடவடிக்கைகள் காரணமாக, இந்தியர்கள் பெருமளவில் இந்தியா திரும்பத் தொடங்கியுள்ளனர். 2025 ஆம் ஆண்டு முழுவதும் 15,100 பேர் திரும்பிய நிலையில், 2026-ன் முதல் ஒன்பது மாதங்களிலேயே 12,700 பேர் நாடு திரும்பியுள்ளது, இந்த எண்ணிக்கை புதிய உச்சத்தை எட்டக்கூடும் என்பதை காட்டுகிறது.
உள்நாட்டு வேலைவாய்ப்பு சந்தையின் நிலை
வெளிநாட்டில் அனுபவம் பெற்ற ஊழியர்கள் திரும்புவதால், இந்திய சந்தையில் பெரிய வேலைவாய்ப்பு மாற்றம் ஏற்படும் என எதிர்பார்க்கப்பட்டது. ஆனால், 2021-ல் இருந்தது போன்ற பெரிய ஹையரிங் அலை தற்போது இல்லை. மாறாக, நிறுவனங்கள் செயற்கை நுண்ணறிவு (AI), மெஷின் லேர்னிங் மற்றும் கிளவுட் இன்ஃப்ராஸ்டிரெக்சர் போன்ற குறிப்பிட்ட தொழில்நுட்பத் திறன் கொண்டவர்களுக்கே முன்னுரிமை அளிக்கின்றன.
ஊதியத்தில் பெரும் சரிவு
திரும்பி வருபவர்களுக்கு மிகப்பெரிய சவாலாக இருப்பது ஊதியக் கட்டமைப்புதான். அமெரிக்காவில் $70,000 முதல் $150,000 வரை சம்பாதித்தவர்கள், இந்தியாவில் அதே பதவிக்கு $20,000 முதல் $32,000 வரை மட்டுமே ஊதியம் பெறுகின்றனர். அதாவது, அவர்கள் அமெரிக்காவில் வாங்கிய சம்பளத்தில் வெறும் 25% முதல் 33% மட்டுமே இங்கு கிடைக்கிறது. இந்திய நிறுவனங்கள் வெளிநாட்டு அனுபவத்திற்காக கூடுதல் ஊதியம் வழங்கத் தயாராக இல்லை.
முதலீட்டாளர்கள் கவனிக்க வேண்டியவை
இந்த மாற்றம் இந்திய ஐடி மற்றும் GCC துறைகளுக்கு சாதகமாகவும், சவாலாகவும் உள்ளது. அதிக திறமையுள்ள ஊழியர்கள் கிடைப்பது நிறுவனங்களின் வளர்ச்சியை விரைவுபடுத்தும் என்றாலும், உள்நாட்டு சந்தையில் போதிய வேலைவாய்ப்புகள் இல்லாதது ஊதிய அழுத்தத்தை (Wage Stagnation) உருவாக்கலாம். GCC நிறுவனங்கள் இந்தத் திறமையாளர்களை லாபகரமாகப் பயன்படுத்துமா அல்லது பணியாளர் எதிர்பார்ப்புகளுக்கும் நிறுவன சலுகைகளுக்கும் இடையே இடைவெளி நீடிக்குமா என்பதை பொறுத்திருந்துதான் பார்க்க வேண்டும்.