உத்தரப் பிரதேசத்தில் விற்பனை செய்யப்படும் பேக்கேஜ்டு குடிநீர் நிறுவனங்களுக்கு, மார்ச் 31, 2027-க்குள் BIS சான்றிதழ் பெறுவதை மாநில அரசு கட்டாயமாக்கியுள்ளது.
உத்தரப் பிரதேச மாநில உணவுப் பாதுகாப்பு மற்றும் மருந்து நிர்வாகம் (FSDA), குடிநீர் நிறுவனங்கள் மீதான பிடியை இறுக்கியுள்ளது. மாநிலத்தின் அனைத்து பேக்கேஜ்டு குடிநீர் மற்றும் மினரல் வாட்டர் தயாரிப்பு நிறுவனங்களும் கட்டாயம் BIS (Bureau of Indian Standards) சான்றிதழ் பெற்றிருக்க வேண்டும் என உத்தரவிடப்பட்டுள்ளது. புதிய நிறுவனங்கள் உரிமம் பெறுவதற்கு முன்பே இந்த சான்றிதழைப் பெறுவது அவசியம் எனத் தெரிவிக்கப்பட்டுள்ளது.
ஆய்வில் வெளியான அதிர்ச்சி தகவல்கள்
சமீபத்திய சோதனையில் 660 மாதிரிகள் ஆய்வு செய்யப்பட்டன. இதில் 513 மாதிரிகள், அதாவது சுமார் 78% குடிநீர் தரம் குறைந்ததாகவும், சுகாதாரமற்றதாகவும் இருப்பது கண்டறியப்பட்டுள்ளது. இதில் ஈ-கோலை (E. coli), பாக்டீரியா, ஈஸ்ட் மற்றும் பூஞ்சை போன்ற அபாயகரமான கிருமிகள் இருப்பது உறுதி செய்யப்பட்டுள்ளது. பல நிறுவனங்களில் ஓசோனைசேஷன் (Ozonization) அல்லது UV ட்ரீட்மென்ட் போன்ற அடிப்படை சுத்திகரிப்பு வசதிகள் கூட இல்லை என்பது விசாரணையில் தெரியவந்துள்ளது.
சந்தையில் என்ன நடக்கும்?
இந்தக் கட்டுப்பாடு காரணமாக, பெரிய முதலீடு செய்ய முடியாத சிறிய அளவிலான நிறுவனங்கள் தொழிலை விட்டு வெளியேற வேண்டிய சூழல் உருவாகலாம். தற்போதுள்ள 968 நிறுவனங்கள் மார்ச் 2027-க்குள் தங்களை மேம்படுத்திக் கொள்ள வேண்டும். ஏற்கனவே 152 உரிமங்கள் தற்காலிகமாக ரத்து செய்யப்பட்டுள்ளன.
முதலீட்டாளர்கள் கவனத்திற்கு
FSSAI அமைப்பின் வழிகாட்டுதல்கள் ஒருபுறம் இருந்தாலும், உத்தரப் பிரதேச அரசின் இந்தத் தனிப்பட்ட கட்டுப்பாடு நிறுவனங்களுக்கு கூடுதல் நிர்வாகச் சுமையை ஏற்படுத்தலாம். தரமான சுத்திகரிப்பு வசதிகளைக் கொண்ட பெரிய நிறுவனங்கள் இந்த மாற்றத்தால் சந்தையில் முன்னிலை பெற வாய்ப்புள்ளது. வரும் நாட்களில் சிறு நிறுவனங்களின் உற்பத்தி முடக்கம் மற்றும் சந்தை ஒருங்கிணைப்பு (Consolidation) எப்படி அமைகிறது என்பதை உன்னிப்பாக கவனிக்க வேண்டும்.