Rapido-வின் அதிரடி என்ட்ரி: உணவு டெலிவரி சந்தையில் Zomato, Swiggy-க்கு சிக்கல்!

பைக் டாக்ஸி சேவையில் முன்னணி நிறுவனமான Rapido, தனது புதிய உணவு டெலிவரி தளமான Ownly-ஐ ஹைதராபாத் சந்தையில் களமிறக்கியுள்ளது. பெங்களூருவில் ஏற்கனவே வெற்றிகரமாக இயங்கி வரும் இந்த சேவை, தினமும் 50,000-க்கும் மேற்பட்ட ஆர்டர்களை கையாள்கிறது. ஹைதராபாத்தில் மட்டும் சுமார் 10,000 உணவகங்களை இணைத்துள்ள Rapido, வரும் காலங்களில் இந்த எண்ணிக்கையை மூன்று மடங்காக உயர்த்தத் திட்டமிட்டுள்ளது.

கமிஷன் இல்லாத புதிய யுக்தி

தற்போது உணவு டெலிவரி சந்தையில் Zomato மற்றும் Swiggy ஆகிய நிறுவனங்கள் ஆதிக்கம் செலுத்தி வருகின்றன. அந்த நிறுவனங்களில் ஆர்டரின் மதிப்பு சராசரியாக ₹400 முதல் ₹420 வரை இருக்கும் நிலையில், Rapido சுமார் ₹250 மதிப்புள்ள ஆர்டர்களைக் குறிவைத்து களம் புகுந்துள்ளது. உணவகங்களிடம் கமிஷன் வசூலிக்காமல், வாடிக்கையாளர்களிடம் டெலிவரி கட்டணம் வசூலிக்கும் புதிய மாடலை இது கையாள்கிறது.

லாஜிஸ்டிக்ஸ் பலம்

உணவு டெலிவரி நிறுவனங்களின் மொத்த செலவில் 85% முதல் 90% வரை லாஜிஸ்டிக்ஸ் செலவுகளே ஆக்கிரமித்துள்ளன. Rapido ஏற்கனவே வைத்துள்ள பைக் டாக்ஸி கட்டமைப்பு மற்றும் தொழில்நுட்பத்தை இதற்கும் பயன்படுத்துவதால், கூடுதல் முதலீடு இன்றி லாபகரமான வணிகத்தை கட்டமைக்க முடியும் என அந்நிறுவனம் நம்புகிறது.

எதிர்கால இலக்கு

விரைவில் டெல்லி, மும்பை, புனே, கொல்கத்தா, அகமதாபாத் மற்றும் சூரத் ஆகிய நகரங்களுக்கும் இந்தச் சேவையை விரிவுபடுத்த Rapido திட்டமிட்டுள்ளது. இருப்பினும், விரைவான டெலிவரி (10-minute delivery) போன்ற போட்டிகளில் இறங்காமல், ஒரு நிலையான வணிகத்தை உருவாக்கவே அந்நிறுவனம் முன்னுரிமை அளிக்கிறது. அடுத்த நிதியாண்டிற்குள் கம்பெனி அளவில் லாபத்தை (Profitability) எட்டுவதே Rapido-வின் முக்கிய இலக்காக உள்ளது.