இந்தியாவில் ஸ்மார்ட்போன் மற்றும் லேப்டாப் நிறுவனங்கள் தற்போது லாபத்தை அதிகரிக்க பிரீமியம் ரக மாடல்களுக்கு முக்கியத்துவம் கொடுத்து வருகின்றன. இதனால் பட்ஜெட் விலையில் கிடைக்கும் எலக்ட்ரானிக் சாதனங்களின் எண்ணிக்கை கணிசமாக குறைந்து வருகிறது.
இந்திய நுகர்வோர் மின்னணு சந்தையில் பெரிய மாற்றம் ஏற்பட்டுள்ளது. ஜூன்-செப்டம்பர் காலாண்டில், நிறுவனங்கள் குறைந்த விலை தயாரிப்புகளை குறைத்துவிட்டு, அதிக விலை கொண்ட பிரீமியம் மாடல்களில் கவனம் செலுத்துகின்றன. மொத்த மாடல்களின் எண்ணிக்கை 153-லிருந்து 144 ஆக குறைந்துள்ளது. இது நிறுவனங்களின் புதிய வியூகத்தை வெளிச்சம் போட்டுக் காட்டுகிறது.
ஸ்மார்ட்போன்களில் பிரீமியம் புஷ்
ஸ்மார்ட்போன்களின் ஆரம்ப விலை 14% வரை உயர்ந்துள்ளது. குறிப்பாக, ₹1 லட்சம் ரூபாய்க்கு மேல் உள்ள 'அல்ட்ரா-பிரீமியம்' போன்களின் எண்ணிக்கை சென்ற காலாண்டில் 5 ஆக இருந்த நிலையில், தற்போது 26 ஆக அதிகரித்துள்ளது. இது நிறுவனங்களுக்கு அதிக லாபத்தை ஈட்டித் தந்தாலும், விலை உணர்வுள்ள இந்திய நுகர்வோர் மத்தியில் விற்பனை அளவு குறைய வாய்ப்புள்ளதா என்ற கேள்வி எழுந்துள்ளது.
லேப்டாப் மற்றும் டிவி சந்தை
லேப்டாப் சந்தையில் நிலைமை இன்னும் தீவிரமாக உள்ளது. புதிய வெளியீடுகளில் பாதிக்கும் மேற்பட்டவை ₹1.5 லட்சம் ரூபாய்க்கும் மேல் விலை கொண்டவை. ₹50,000 முதல் ₹75,000 வரையிலான பட்ஜெட் லேப்டாப்கள் கிடைப்பது அரிதாகிவிட்டது. இந்தியாவில் லேப்டாப் பிராண்டுகளின் எண்ணிக்கை 13-லிருந்து 8 ஆக சுருங்கியுள்ளது, இதில் Asus போன்ற நிறுவனங்களின் ஆதிக்கம் அதிகமாக உள்ளது.
டிவி சந்தையில் LG போன்ற நிறுவனங்கள் OLED டிஸ்ப்ளேக்களுக்கு அதிக முக்கியத்துவம் அளிக்கின்றன. ஒட்டுமொத்தமாக, ₹10,000-க்கும் குறைவான ஸ்மார்ட்போன்கள் மற்றும் ₹30,000-க்கும் குறைவான டிவிகள் சந்தையில் குறைந்து வருவது, குறைந்த பட்ஜெட் வாடிக்கையாளர்களுக்கு சவாலாக மாறியுள்ளது.