இந்தியாவில் ரீடெயில் விற்பனை செப்டம்பர் மாதத்தில் **8%** வளர்ச்சி கண்டுள்ளது. உணவு, ஆடை மற்றும் உணவகங்களில் தேவை அதிகரித்துள்ள நிலையில், அக்டோபர் மற்றும் நவம்பர் மாத பண்டிகை விற்பனை எப்படி இருக்கும் என முதலீட்டாளர்கள் எதிர்பார்த்து காத்திருக்கின்றனர்.
Retailers Association of India வெளியிட்டுள்ள தரவுகளின்படி, செப்டம்பர் மாதத்தில் இந்தியாவின் ரீடெயில் விற்பனை 8% உயர்ந்துள்ளது. பண்டிகை காலம் தொடங்குவதற்கு முன்பே இந்த வளர்ச்சி பதிவாகியுள்ளது குறிப்பிடத்தக்கது.
எந்தெந்த துறைகள் முன்னணியில்?
- Quick-service restaurants: 11% அதிரடி வளர்ச்சி கண்டுள்ளது.
- உணவு, மளிகை மற்றும் ஆடைத் துறை: தலா 9% வளர்ச்சியைப் பதிவு செய்துள்ளன.
- அழகு சாதனங்கள், எலக்ட்ரானிக்ஸ்: 7% வளர்ச்சி.
- ஆபரணங்கள் மற்றும் விளையாட்டுப் பொருட்கள்: 6% உயர்வு.
- காலணிகள்: 5% வளர்ச்சி.
பிராந்திய வாரியான விற்பனை:
இந்த வளர்ச்சி இந்தியா முழுவதும் பரவலாக உள்ளது. குறிப்பாக மேற்கு இந்தியாவில் 10% மற்றும் தென்னிந்தியாவில் 9% வளர்ச்சி பதிவாகியுள்ளது. வட இந்தியாவில் 7% மற்றும் கிழக்கு இந்தியாவில் 5% என விற்பனை சீராக உள்ளது.
முதலீட்டாளர்களின் பார்வை என்ன?
ஆகஸ்ட் மாதம் 10% வளர்ச்சியைத் தொட்டிருந்த நிலையில், செப்டம்பரில் 8% ஆகச் சற்று குறைந்துள்ளது. இதற்கு முக்கிய காரணம் பண்டிகை கால தேதிகள் மாறியதுதான். கடந்த ஆண்டு செப்டம்பரில் நவராத்திரி கொண்டாட்டங்கள் இருந்தன, இந்த ஆண்டு அவை அக்டோபர் மற்றும் நவம்பர் மாதங்களுக்கு மாறியுள்ளன. இதனால், அக்டோபர் மற்றும் நவம்பர் மாதங்களில் விற்பனை மீண்டும் சூடுபிடிக்குமா என்பதை பொறுத்திருந்து பார்க்க வேண்டும்.