இந்தியாவில் புரோட்டீன் சார்ந்த உணவுப் பொருட்களுக்கான தேவை அதிரடியாக உயர்ந்து வருகிறது. இதற்காகப் புதிய தொழிற்சாலைகள் மற்றும் கஃபே கூட்டணியில் நிறுவனங்கள் முதலீடு செய்து வருகின்றன. இருப்பினும், வே ப்ரோட்டீன் (Whey Protein) விலை 4 மடங்கு உயர்ந்துள்ளது லாபத்திற்கு பெரும் சவாலாக மாறியுள்ளது.
இந்திய நுகர்வோர் மத்தியில் புரோட்டீன் கலாச்சாரம் தற்போது ஜிம்முடன் மட்டும் நின்றுவிடாமல், அன்றாட உணவு பழக்கமாக மாறியுள்ளது. வரும் 2031-க்குள் இந்த சந்தை ₹15,300 கோடியிலிருந்து ₹21,000 கோடியாக உயரும் என IMARC தரவுகள் தெரிவிக்கின்றன.
கஃபேக்களின் அதிரடி கூட்டணி
புரோட்டீன் உணவுகளை எளிதாக நுகர்வோரிடம் கொண்டு சேர்க்க முன்னணி கஃபேக்கள் களம் இறங்கியுள்ளன. Chaayos நிறுவனம் Wholsum Foods-உடன் இணைந்து புரோட்டீன் டீயையும், Tim Hortons இந்தியா Amul-உடன் இணைந்து புரோட்டீன் காபியையும் அறிமுகம் செய்துள்ளன. அதேபோல், Tata Starbucks தனது மெனுவில் புரோட்டீன் கோல்ட் ஃபோம் (Cold Foam)-ஐச் சேர்த்துள்ளது. இது வெறும் தற்காலிக டிரெண்ட் அல்ல என்பதை இந்நிறுவனங்களின் செயல்பாடு உணர்த்துகிறது.
முதலீட்டு மழை
இந்த வளர்ச்சியைப் பயன்படுத்திக் கொள்ள நிறுவனங்கள் பெரும் முதலீடுகளைச் செய்து வருகின்றன. Milky Mist நிறுவனம் கிரேக்க யோகர்ட் மற்றும் ஸ்கைர் தயாரிப்பிற்காக ₹40 கோடி முதலீட்டில் புதிய ஆலையை அமைத்துள்ளது. அதேபோல ஸ்டார்ட்அப் நிறுவனங்களான Arboreal Bioinnovations ₹230 கோடியும், Provilac $14 மில்லியன் நிதியையும் திரட்டியுள்ளன. USV நிறுவனம் Wellbeing Nutrition-ல் 79% பங்குகளை ₹1,583 கோடிக்கு வாங்கியதும், Hindustan Unilever மற்றும் Marico நிறுவனங்களின் அதிரடி முதலீடுகளும் இந்தத் துறையின் சூட்டை வெளிப்படுத்துகின்றன.
முதலீட்டாளர்களுக்கு உள்ள சிக்கல் என்ன?
எல்லாமே சாதகமாகத் தெரிந்தாலும், வே ப்ரோட்டீன் மூலப்பொருட்களின் விலை சர்வதேச சந்தையில் 4 மடங்கு உயர்ந்துள்ளது பெரிய தலைவலியாக மாறியுள்ளது. இதனால் நிறுவனங்களின் லாப வரம்பு (Profit Margin) கடும் அழுத்தத்திற்கு உள்ளாகியுள்ளது. இந்த கூடுதல் செலவை நுகர்வோர் மீது சுமத்தினால், புரோட்டீன் உணவுகளுக்கான தேவை குறைய வாய்ப்புள்ளது. எனவே, நிறுவனங்கள் மூலப்பொருட்களை சிக்கனமாக கொள்முதல் செய்கின்றனவா அல்லது லாபத்தை விட்டுக்கொடுத்து சந்தை பங்கைக் காக்கின்றனவா என்பதை முதலீட்டாளர்கள் உன்னிப்பாக கவனிக்க வேண்டும்.