இந்தியாவின் பானங்கள் சந்தையில் ITC காலடி எடுத்து வைத்துள்ளது. 'B Natural Coconut Cola' என்ற பெயரில், குறைந்த கலோரி மற்றும் தேங்காய் தண்ணீரால் ஆன புதிய பானத்தை அறிமுகம் செய்துள்ளது. ₹60 விலையில் 250ml கேனில் வரும் இந்த ட்ரிங்க், ஆரோக்கியத்தில் கவனம் செலுத்தும் நுகர்வோரை குறிவைக்கிறது. இது, கூல்டிரிங்க்ஸ் துறையில் பெரிய நிறுவனங்களுக்கு போட்டியாக அமைந்துள்ளது.
என்ன ஸ்பெஷல் இந்த கோலா?
ITC நிறுவனம், இனிப்பு சுவைக்கும், காஃபின்-க்கும் பெயர் பெற்ற பாரம்பரிய கோலாக்களுக்கு மாற்றாக, தேங்காய் தண்ணீரை கலந்து 'B Natural Coconut Cola'வை களமிறக்கியுள்ளது. இது ஆரோக்கியத்தை மையமாக கொண்ட ஒரு புதுமையான முயற்சியாகும்.
இந்த பானத்தில் ஒரு சர்விங்கிற்கு வெறும் 9 கிலோகலோரிகள் மட்டுமே உள்ளது. மேலும், இதில் கூடுதலாக சர்க்கரை அல்லது காஃபின் சேர்க்கப்படவில்லை என நிறுவனம் தெரிவித்துள்ளது.
சந்தையில் நிலவரம் என்ன?
ITC, நேரடியாக Coca-Cola மற்றும் PepsiCo போன்ற பெரிய நிறுவனங்களுடன் விலை யுத்தம் செய்வதை தவிர்த்து, பிரீமியம் சந்தையை குறிவைத்துள்ளது. ₹60 விலையில் 250ml கேனில் வரும் இந்த பானம், சாதாரண குளிர்பானங்களை விட விலை உயர்ந்தது.
நகர்ப்புறங்களில், குறிப்பாக ஆரோக்கியமான உணவு மற்றும் பானங்களை தேடும் வாடிக்கையாளர்களை இது ஈர்க்கும் என எதிர்பார்க்கப்படுகிறது. தற்போது டெல்லி, மும்பை, பெங்களூரு, புனே போன்ற முக்கிய நகரங்களில் மட்டும் கிடைக்கிறது.
எதிர்கொள்ளும் சவால்கள்
ITC-யின் முக்கிய வருவாய் ஆதாரமான புகையிலை வணிகத்தை சார்ந்திருப்பதை குறைக்கும் முயற்சியில், இந்த பானங்கள் துறைக்குள் நுழைவது ஒரு முக்கிய படி. ஆனால், ஏற்கனவே தங்கள் சந்தையை வலுவாக பிடித்துள்ள பெரிய நிறுவனங்களின் விநியோக வலையமைப்பு மற்றும் விளம்பர செலவுகளுக்கு மத்தியில், இந்தப் புதிய பானம் எப்படி வெற்றி பெறும் என்பதுதான் கேள்வி.
Reliance கூட 'Campa' பிராண்டை மீண்டும் கொண்டு வந்துள்ளது. இதனால், இந்தப் போட்டி நிறைந்த சந்தையில், ITC தனது விநியோகத்தை விரிவுபடுத்தி, வாடிக்கையாளர்களின் நம்பிக்கையை பெறுவது அவசியம்.
ஆராய்ச்சி மற்றும் மேம்பாடு
ITC-யின் லைஃப் சயின்சஸ் & டெக்னாலஜி சென்டர் இந்த பானத்தை உருவாக்கியுள்ளது. இதன் வெற்றி, சந்தைப்படுத்தல் மற்றும் விநியோக செலவுகளை நிர்வகித்து, லாப வரம்புகளை (Profit Margins) பராமரிப்பதில் தான் அடங்கியுள்ளது. தேங்காய் தண்ணீர் போன்ற பொருட்களை அதிக அளவில் கையாளும் திறன், தரத்தை உறுதி செய்தல் ஆகியவை முக்கியமாகும். முக்கிய நகரங்களில் இதன் வரவேற்பு எப்படி இருக்கிறது என்பதையும், சிறிய நகரங்களுக்கு விரிவுபடுத்தும் போது பிராண்ட் இமேஜை தக்கவைக்கிறதா என்பதையும் முதலீட்டாளர்கள் உன்னிப்பாக கவனிப்பார்கள்.