FSSAI அதிரடி: முன்னணி உணவு நிறுவனங்கள் மீது கடுமையான கட்டுப்பாடுகள்!

இந்திய உணவுப் பாதுகாப்பு மற்றும் தர நிர்ணய ஆணையம் (FSSAI) நாடு முழுவதும் தனது கண்காணிப்பை தீவிரப்படுத்தியுள்ளது. தற்போது நடைபெற்று வரும் இந்த அதிரடி சோதனையில், உள்நாட்டு மற்றும் சர்வதேச அளவில் புகழ்பெற்ற உணவு நிறுவனங்களுக்கு 150-க்கும் மேற்பட்ட நோட்டீஸ்கள் வழங்கப்பட்டுள்ளன. தவறான விளம்பரங்கள், சுகாதார குறைபாடுகள் மற்றும் லேபிளிங் விதிகளை மீறியது உள்ளிட்ட காரணங்களுக்காக இந்த நடவடிக்கை எடுக்கப்பட்டுள்ளது.

சிக்கலில் உள்ள நிறுவனங்கள்

இந்த பட்டியலில் Nestlé India, PepsiCo, Coca-Cola India, Mondelez மற்றும் Abbott India போன்ற ஜாம்பவான்களும், Domino's, McDonald's, KFC, Pizza Hut மற்றும் Costa Coffee போன்ற முன்னணி உணவகங்களும் உள்ளன. சில Domino's கிளைகள் மற்றும் கிடங்குகளின் உரிமங்கள் கூட தற்காலிகமாக ரத்து செய்யப்பட்டுள்ளன.

வார்னிங் லேபிள்களின் தாக்கம்

தற்போதைய முக்கிய விவாதமே, இனிப்புகள், கொழுப்பு மற்றும் உப்பு சத்து அதிகமாக உள்ள பொருட்களின் பேக்கேஜிங்கில் 'சிவப்பு நிற ஹெக்சகோனல்' வார்னிங் லேபிள்களை கட்டாயமாக்குவதுதான். இது குறித்து உச்ச நீதிமன்றத்தில் வழக்கு நடைபெற்று வருகிறது. இந்த தீர்ப்பு உணவுத் துறையின் விற்பனை மற்றும் பிராண்ட் மதிப்பீட்டில் மிகப்பெரிய மாற்றத்தை ஏற்படுத்தும் என்று எதிர்பார்க்கப்படுகிறது.

முதலீட்டாளர்களுக்கு என்ன பாதிப்பு?

இந்த கடுமையான விதிமுறைகள் நிறுவனங்களின் லாப வரம்பை (Profit Margins) நேரடியாக பாதிக்க வாய்ப்புள்ளது. பேக்கேஜிங் வடிவமைப்பு மாற்றம், தயாரிப்புகளை மறுசீரமைப்பு செய்தல் மற்றும் தணிக்கை செலவுகள் ஆகியவற்றால் நிறுவனங்களின் செலவுகள் அதிகரிக்கும். பல நிறுவனங்கள் ஏற்கனவே '100% நேச்சுரல்' போன்ற வாசகங்களை விளம்பரங்களில் இருந்து நீக்கத் தொடங்கிவிட்டன. எனவே, இனி வரும் காலாண்டு முடிவுகளில் (Quarterly Results) சட்ட மற்றும் இணக்கச் செலவுகள் (Compliance Costs) எவ்வளவு உயர்ந்துள்ளது என்பதை முதலீட்டாளர்கள் உன்னிப்பாக கவனிக்க வேண்டும்.