Blinkit நிறுவனத்தின் CEO Albinder Dhindsa, இனி சொந்தமாக ப்ரைவேட் லேபிள் (Private Labels) தயாரிப்புகளை விரிவுபடுத்தப் போவதில்லை என்று அறிவித்துள்ளார். உற்பத்திச் செலவுகளைத் தவிர்த்து, விளம்பர வருமானத்தில் (Ad Revenue) அதிக கவனம் செலுத்த நிறுவனம் முடிவு செய்துள்ளது.
Zomato-வின் ஒரு அங்கமான Blinkit, தனது வணிக உத்தியில் ஒரு முக்கிய மாற்றத்தை அறிவித்துள்ளது. இனி சொந்தமாக ப்ரைவேட் லேபிள் தயாரிப்புகளை உருவாக்குவதை விட, தளத்தில் விளம்பரங்கள் மூலம் கிடைக்கும் வருமானத்தை அதிகரிப்பதிலேயே நிறுவனம் உறுதியாக உள்ளது.
விளம்பர வருமானமே லாபத்திற்கான வழி!
சொந்த தயாரிப்புகளை உருவாக்குவது என்பது உற்பத்தி, விநியோக சங்கிலி மேலாண்மை மற்றும் சந்தைப்படுத்தல் என பெரும் சவால்களைக் கொண்டது. இந்தச் செலவுகளைத் தவிர்ப்பதன் மூலம், தனது வணிகத்தை 'Asset-light' ஆக வைத்திருக்க Blinkit விரும்புகிறது. ஏற்கனவே தளத்தில் விளம்பரம் செய்யும் நிறுவனங்களுக்குப் போட்டியாக சொந்த தயாரிப்புகளை அறிமுகப்படுத்தினால், அது மற்ற நிறுவனங்களின் நம்பிக்கையைக் குலைக்கும் என்று நிர்வாகம் கருதுகிறது. இதனால், ஒரு நடுநிலையான சந்தையாக (Neutral Marketplace) செயல்பட்டு, மற்ற நிறுவனங்களிடம் இருந்து அதிக விளம்பர வருவாயைப் பெறுவதே நிறுவனத்தின் நோக்கம்.
'Whole Farm' தொடருமா?
சிக்கலான தயாரிப்புகளைத் தவிர்த்தாலும், அரிசி, பருப்பு மற்றும் உலர் பழங்கள் போன்ற அடிப்படைத் தேவைகளுக்காக 'Whole Farm' என்ற பிராண்டை மட்டும் Blinkit தொடர்ந்து முன்னெடுக்கும். இவை எளிதில் கையாளக்கூடியவை என்பதால், பெரிய முதலீடுகள் இல்லாமல் தரம் பராமரிக்கப்படுகிறது.
Swiggy Instamart vs Blinkit
இந்த முடிவானது, அதன் முக்கியப் போட்டியாளரான Swiggy Instamart-ன் செயல்பாட்டிற்கு நேர்மாறாக உள்ளது. Swiggy தனது 'Noice' என்ற பிராண்ட் மூலம் சொந்தத் தயாரிப்புகளைத் தீவிரமாக ஊக்குவித்து வருகிறது. Swiggy சொந்தத் தயாரிப்புகளை லாபத்திற்கான ஒரு வழியாகப் பார்க்க, Blinkit ஒரு விளம்பரத் தளமாக மாறி வருவாயை ஈட்ட முயல்கிறது. இந்த இரண்டு மாறுபட்ட யுக்திகளில் எது முதலீட்டாளர்களுக்கு அதிக லாபத்தை ஈட்டித் தரும் என்பது வரும் காலங்களில் தெரியவரும்.