பியூட்டி பார்லர் கட்டணம் இருமடங்கு உயர்வு: பண்டிகை காலத்திலும் குறையாத வாடிக்கையாளர்கள் கூட்டம்!

நவராத்திரி மற்றும் துர்கா பூஜை கொண்டாட்டங்கள் சூடுபிடித்துள்ள நிலையில், பியூட்டி பார்லர் மற்றும் மொபைல் பியூட்டி சர்வீஸ் கட்டணங்கள் கடந்த ஆண்டை விட அதிரடியாக உயர்ந்துள்ளன. இதனால் வாடிக்கையாளர்கள் கூடுதல் செலவை சந்திக்க வேண்டிய கட்டாயத்திற்கு தள்ளப்பட்டுள்ளனர்.

விலையேற்றத்திற்கு பின்னணியில் உள்ள காரணங்கள்:

பியூட்டி பொருட்களுக்கு தேவையான பாமாயில் (Palm Oil) மற்றும் ஸ்பெஷாலிட்டி கெமிக்கல்ஸ் ஆகியவற்றின் விலை கடந்த ஓராண்டில் 25% முதல் 30% வரை உயர்ந்துள்ளது. மேற்கு ஆசியாவில் நிலவும் போர் சூழலால் விநியோகச் சங்கிலியில் (Supply Chain) ஏற்பட்டுள்ள பாதிப்புகளும், இறக்குமதி செலவுகளை அதிகரித்துள்ளன. இந்த கூடுதல் சுமையை ஈடுகட்டவே பார்லர் உரிமையாளர்கள் விலையை உயர்த்தியுள்ளனர்.

வரி மாற்றத்தின் தாக்கம்:

பியூட்டி சேவைகளுக்கான GST தற்போது 5% ஆக குறைக்கப்பட்டாலும், இன்புட் டாக்ஸ் கிரெடிட் (Input Tax Credit) நீக்கப்பட்டிருப்பது பெரிய சவாலாக மாறியுள்ளது. இதன் மூலம் உபகரணங்கள் மற்றும் மூலப்பொருட்களுக்கு கட்டிய வரியை, பிசினஸ் உரிமையாளர்களால் திரும்பப் பெற (Refund) முடியாது. இந்த வரி இழப்பை சரிசெய்ய, சேவை கட்டணத்தை நேரடியாக வாடிக்கையாளர் தலையில் சுமத்துகின்றனர்.

குறையாத தேவை:

விலை ₹5,000-ஐ தாண்டி இருந்தாலும், ஆன்லைன் பிளாட்பார்ம்களில் பிரீமியம் பேக்கேஜ்களுக்கான டிமாண்ட் குறையவில்லை. ஆடம்பர அனுபவத்தை விரும்புவோர் இந்த விலை உயர்வை பெரிய விஷயமாக கருதவில்லை என்பது தரவுகள் மூலம் தெரியவந்துள்ளது. பண்டிகை காலத்திற்கு பிறகும் இதே டிமாண்ட் நீடிக்குமா என்பதே முதலீட்டாளர்களின் தற்போதைய கண்காணிப்பு.