Monarch PMS கணிப்பு: தங்கம் விலை இனி உயருமா? அல்லது சரிவு வருமா?

Monarch Portfolio Management Services (PMS), தங்கம் விலை குறித்த புதிய அறிக்கையை வெளியிட்டுள்ளது. அதன்படி, 2026-ஆம் ஆண்டின் இறுதியில், தங்கம் விலை ஒரு அவுன்ஸிற்கு $4,300 முதல் $4,700 வரை வர்த்தகமாகும் என எதிர்பார்க்கப்படுகிறது. இந்த கணிப்பிற்கு 55% வாய்ப்பு உள்ளதாக அந்நிறுவனம் தெரிவித்துள்ளது. இதற்கு முக்கிய காரணமாக உலகெங்கிலும் உள்ள சென்ட்ரல் பேங்க்கள் ஒவ்வொரு காலாண்டிற்கும் சுமார் 250 டன் தங்கத்தை வாங்குவதை சுட்டிக்காட்டுகிறது.

தற்போதைய நிலவரம் என்ன?

ஆகஸ்ட் 2026 இறுதி நிலவரப்படி, சர்வதேச சந்தையில் தங்கம் விலை ஏற்கனவே $4,600 முதல் $4,700 என்ற அளவில் உள்ளது. அதாவது, அந்நிறுவனத்தின் டார்கெட் ஏற்கனவே சந்தையில் பிரதிபலித்துவிட்டது. எனவே, இனிவரும் காலங்களில் தங்கம் விலை மேலும் ஏறுமா என்பது சந்தேகமே.

கவனிக்க வேண்டிய ரிஸ்க்குகள்

அமெரிக்காவின் மத்திய வங்கியான பெடரல் ரிசர்வ் (US Federal Reserve) வட்டி விகிதங்களை மாற்றாமல் வைத்திருந்தால், தங்கத்திற்கு சாதகமாக இருக்கும். ஆனால், ஒருவேளை வட்டி விகிதத்தை உயர்த்தினால், தங்கம் விலை $3,400 முதல் $3,900 வரை சரிய வாய்ப்புள்ளது என எச்சரிக்கிறது Monarch PMS.

சில்வர் ஒரு மாற்று முதலீடா?

தங்கத்திற்கு மாற்றாக வெள்ளியை (Silver) ஒரு சிறந்த முதலீடாகப் பார்க்கலாம் என இந்நிறுவனம் கூறுகிறது. கடந்த 6 ஆண்டுகளாகவே சந்தையில் வெள்ளிக்கான பற்றாக்குறை நிலவுகிறது. தற்போது வெள்ளி விலை $69 என்ற அளவில் உள்ளது. தங்கத்திற்கும் வெள்ளிக்குமான ரேஷியோ (Gold-Silver Ratio) அடிப்படையில் பார்த்தால், வெள்ளி வாங்குவதற்கு இது ஒரு சரியான தருணமாக இருக்கலாம் என நிபுணர்கள் கருதுகின்றனர்.