சீனாவில் இருந்து இறக்குமதி செய்யப்படும் Titanium Dioxide மீது இந்தியா **5** ஆண்டுகளுக்கு ஆண்டி-டம்ப்பிங் (Anti-dumping) வரியை விதித்துள்ளது. இதன்படி ஒரு டன்னுக்கு **$460** முதல் **$681** வரை வரி வசூலிக்கப்படும்.
மத்திய நிதி அமைச்சகம் வெளியிட்டுள்ள புதிய உத்தரவு, சீனாவில் இருந்து இறக்குமதி செய்யப்படும் Titanium Dioxide மீது அடுத்த 5 ஆண்டுகளுக்கு ஆன்டி-டம்ப்பிங் வரியை உறுதி செய்துள்ளது. உள்நாட்டு தயாரிப்பாளர்களைப் பாதுகாக்கவும், நியாயமற்ற விலை குறைப்பைத் தடுக்கவும் இந்த நடவடிக்கை எடுக்கப்பட்டுள்ளது. Directorate General of Trade Remedies நடத்திய நீண்டகால ஆய்வுக்குப் பிறகு இந்த முடிவு எட்டப்பட்டுள்ளது.
பெயிண்ட் நிறுவனங்களுக்கு என்ன பாதிப்பு?
பெயிண்ட் மற்றும் கோடிங் தயாரிப்பில் Titanium Dioxide மிக முக்கியமான மூலப்பொருள். Asian Paints, Berger Paints, மற்றும் Kansai Nerolac போன்ற முன்னணி நிறுவனங்கள் இந்த மூலப்பொருளை அதிகம் பயன்படுத்துகின்றன. இறக்குமதி வரி உயர்வால், இந்த நிறுவனங்களின் உற்பத்தி செலவு (Cost of Production) உடனடியாக உயர வாய்ப்புள்ளது. இதனால், இந்த நிறுவனங்கள் விலையை உயர்த்துமா அல்லது தங்களின் லாபத்தில் (Profit Margins) பாதிப்பை ஏற்குமா என்பதை முதலீட்டாளர்கள் கவனிக்க வேண்டும்.
உள்நாட்டு நிறுவனங்களுக்கு சாதகம்
இந்த கட்டுப்பாடு Kerala Minerals and Metals Ltd மற்றும் Travancore Titanium Products போன்ற இந்திய நிறுவனங்களுக்கு மிகப்பெரிய ஊக்கத்தை அளிக்கும். நீண்டகாலமாக மலிவான சீன இறக்குமதியால் பாதிக்கப்பட்ட இந்த நிறுவனங்கள், இனி உள்நாட்டு சந்தையில் அதிக உற்பத்தி செய்யவும், முதலீடுகளை அதிகரிக்கவும் வாய்ப்பு உருவாகியுள்ளது.
விலக்கு அளிக்கப்பட்ட துறைகள்
அத்தியாவசியத் தேவைகளைக் கருத்தில் கொண்டு, உணவுப் பொருட்கள், மருந்துகள், அழகு சாதனப் பொருட்கள் மற்றும் டெக்ஸ்டைல் துறையில் பயன்படுத்தப்படும் சிறப்பு வகை Titanium Dioxide-க்கு இந்த வரியில் இருந்து விலக்கு அளிக்கப்பட்டுள்ளது.
எதிர்காலத்தில், பெயிண்ட் நிறுவனங்கள் மாற்று நாடுகளை நோக்கி தங்களின் இறக்குமதி யுக்தியை மாற்றுகிறதா அல்லது உள்நாட்டு உற்பத்தியாளர்களுடன் ஒப்பந்தம் செய்கிறதா என்பதுதான் மார்க்கெட்டில் முக்கிய மாற்றத்தை ஏற்படுத்தும்.