India Sugar Price Surge: சர்க்கரைக்கு தட்டுப்பாடு? அடுத்த ஆண்டு விலையேற்றம் உறுதி!

உற்பத்தி கணிப்புகளை மிஞ்சிய வீழ்ச்சி

இந்த சீசனில் சர்க்கரை உற்பத்தி, முதலில் கணிக்கப்பட்ட 31 மில்லியன் டன்னை விடக் குறைந்து 28 மில்லியன் டன்னுக்கும் கீழ் இருக்கும் என எதிர்பார்க்கப்படுகிறது. இதற்கு முக்கிய காரணம், பல சர்க்கரை ஆலைகள் திட்டமிட்டதை விட முன்கூட்டியே மூடப்பட்டதுதான். மார்ச் மாத இறுதிக்குள், 541 ஆலைகளில் 467 ஆலைகள் தங்களது செயல்பாடுகளை நிறுத்திவிட்டன. கடந்த ஆண்டு இதே காலகட்டத்தில் 420 ஆலைகள் மட்டுமே மூடப்பட்டிருந்தன.

கனமழையால் கரும்பு உற்பத்தி பாதிப்பு

கனமழை காரணமாக கரும்பு மகசூல் (Sugarcane Yield) வெகுவாகப் பாதிக்கப்பட்டுள்ளது. நாட்டின் முக்கிய சர்க்கரை உற்பத்திப் பகுதிகளான மகாராஷ்டிரா மற்றும் கர்நாடகாவில் பெரும்பாலான ஆலைகள் வழக்கம் போல் இல்லாமல் முன்னதாகவே மூடப்பட்டுள்ளன.

ஏற்றுமதி திட்டங்களால் கையிருப்பு குறைவு

முன்பு, உபரியாக (Surplus) இருக்கும் என எதிர்பார்த்து, மத்திய அரசு சர்க்கரை ஏற்றுமதி ஒதுக்கீட்டை (Export Quota) 2 மில்லியன் டன் ஆக அதிகரித்தது. ஆனால், தற்போது இந்த உபரி இனி சாத்தியமில்லை. இதன் விளைவாக, அடுத்த சீசனுக்கான தொடக்க இருப்பு (Opening Stocks) 5 மில்லியன் டன்னில் இருந்து 4 மில்லியன் டன்னுக்கும் கீழ் குறையும் என கணிக்கப்பட்டுள்ளது.

சர்க்கரை விலைகள் உயர வாய்ப்பு

இந்த திடீர் உற்பத்தி குறைவு மற்றும் கையிருப்பு குறைவதால், உள்நாட்டு சர்க்கரை விலைகள் (Domestic Sugar Prices) உயரும் என எதிர்பார்க்கப்படுகிறது. சப்ளை (Supply) அதிகமாக இருந்ததால் முன்பு விலைகள் குறைந்திருந்த நிலையில், இப்போது நிலைமை தலைகீழாக மாறும்.