இந்தியாவில் சில்வர் தட்டுப்பாட்டை போக்கவும், விலையை கட்டுப்படுத்தவும் அடுத்த **6 மாதங்களுக்கு 6,500 மெட்ரிக் டன்** சில்வர் இறக்குமதி செய்ய மத்திய அரசு அனுமதி அளித்துள்ளது.
இந்திய சந்தையில் சில்வர் தட்டுப்பாட்டை சரி செய்யவும், வர்த்தகர்கள் செலுத்தும் கூடுதல் பிரீமியம் கட்டணத்தை குறைக்கவும் மத்திய அரசு இந்த முக்கிய முடிவை எடுத்துள்ளது. சர்வதேச விலையை விட உள்நாட்டு சந்தையில் சில்வர் விலை அதிகமாக விற்பனை செய்யப்பட்டு வந்தது, இதற்கு முற்றுப்புள்ளி வைக்கவே இந்த இறக்குமதி அனுமதி வழங்கப்பட்டுள்ளது.
ஏன் இந்த கட்டுப்பாடு?
இதற்கு முன், அந்நிய செலாவணியை பாதுகாக்கவும் தேவையற்ற இறக்குமதியை தவிர்க்கவும் அரசு கடும் கட்டுப்பாடுகளை விதித்திருந்தது. சில்வர் இறக்குமதி மீதான வரி 6%-லிருந்து 15% ஆக உயர்த்தப்பட்டது, இதுவே சப்ளை சங்கிலியில் பெரிய பாதிப்பை ஏற்படுத்தியது. தற்போது பண்டிகை காலத்தை முன்னிட்டு தொழில் மற்றும் நகை நிறுவனங்களுக்கு தட்டுப்பாடு ஏற்படக்கூடாது என்பதில் அரசு உறுதியாக உள்ளது.
சந்தையில் என்ன தாக்கம்?
அரசு இந்த அறிவிப்பை வெளியிட்ட சில மணி நேரங்களிலேயே மாற்றங்கள் எதிரொலிக்கத் தொடங்கின. முன்னர் ஒரு அவுன்ஸ் சில்வருக்கு $2.50 வரை இருந்த பிரீமியம், தற்போது 45 சென்ட் என்ற நிலைக்கு சரிந்துள்ளது. இது சர்வதேச விலையுடன் உள்நாட்டு விலையை நெருக்கமாக கொண்டு வர உதவும்.
முதலீட்டாளர்கள் கவனத்திற்கு...
இந்த அளவு பெரிய அளவிலான இறக்குமதியை சந்தை எதிர்பார்க்கவில்லை. தற்போது பண்டிகை காலம் இருந்தும் சில்வர் விற்பனை எதிர்பார்த்ததை விட மந்தமாகவே உள்ளது. சந்தையில் சில்வர் கையிருப்பு (Inventory) அதிகமாகி, விற்பனை ஆகாமல் தேங்க வாய்ப்புள்ளதா என்பதுதான் இப்போது பெரிய கேள்வி. பண்டிகைக்கால விற்பனை தரவுகள் மற்றும் சில்வர் இறக்குமதியின் வேகத்தைப் பொறுத்தே, சில்வர் விலையில் மேலும் சரிவு ஏற்படுமா என்பது தெரியவரும்.