ஐரோப்பிய ஒன்றியத்தின் புதிய விதிமுறைகளால் இந்தியாவிற்கு வரும் உலோக ஸ்கிராப் (Metal Scrap) இறக்குமதி தடைபட வாய்ப்புள்ளது. இதனால் ஜிங்க், காப்பர், அலுமினியம் தயாரிப்பு செலவு உயரும் அபாயம் ஏற்பட்டுள்ளது.
ஐரோப்பிய ஆணையம் முன்வைத்துள்ள புதிய 'வேஸ்ட் ஷிப்மென்ட் ரெகுலேஷன்' (Waste Shipment Regulation) வரைவு அறிக்கை, இந்திய உலோக மறுசுழற்சி நிறுவனங்களுக்கு பெரும் கவலையை ஏற்படுத்தியுள்ளது. இந்த விதியின்படி, ஆசிய நாடுகளுக்கு ஏற்றுமதி செய்யப்படும் உலோக ஸ்கிராப் குறித்த கட்டுப்பாடுகள் கடுமையாக்கப்பட உள்ளன. இதில் இந்தியா இடம் பெற்றிருந்தாலும், உலோக ஸ்கிராப் இறக்குமதிக்கான அங்கீகாரம் விடுபட்டுள்ளது.
இந்தியாவின் இரண்டாம் நிலை உலோகத் துறையைப் பொறுத்தவரை, ஐரோப்பிய நாடுகளிலிருந்து வரும் ஸ்கிராப் மிக முக்கியமானது. தற்போதைய புள்ளிவிவரங்களின்படி, இந்தியாவின் அலுமினியம் ஸ்கிராப் தேவையில் 20%, காப்பர் ஸ்கிராப்பில் 22%, மற்றும் ஜிங்க் ஸ்கிராப்பில் சுமார் 40% ஐரோப்பாவிலிருந்துதான் இறக்குமதி செய்யப்படுகிறது.
லாபத்தில் பாதிப்பு ஏற்படுமா?
உள்நாட்டு ஸ்கிராப் சேகரிப்பு போதுமானதாக இல்லாததால், MSME நிறுவனங்கள் இந்த இறக்குமதியையே பெரிதும் நம்பியுள்ளன. ஒருவேளை இந்த இறக்குமதி தடைபட்டால், நிறுவனங்கள் அதிக விலை கொண்ட 'வெர்ஜின்' (Virgin) உலோகங்களை பயன்படுத்த வேண்டியிருக்கும். லண்டன் மெட்டல் எக்ஸ்சேஞ்ச் விலையுடன் ஒப்பிடும்போது, ஸ்கிராப் மலிவானது என்பதால், இத்தகைய மாற்றம் நிறுவனங்களின் லாப வரம்பை (Profit Margin) கணிசமாகக் குறைக்கும்.
அடுத்தகட்ட நடவடிக்கைகள்
இந்த விவகாரம் குறித்து மெட்டீரியல் ரீசைக்கிளிங் அசோசியேஷன் ஆஃப் இந்தியா (MRAI), மத்திய வர்த்தக அமைச்சகத்திடம் முறையிட்டுள்ளது. அக்டோபர் 16-க்குள் இதற்கான கருத்துகளை தெரிவிக்க ஐரோப்பிய ஒன்றியம் கால அவகாசம் அளித்துள்ளது. மே 2027-க்குள் இந்த புதிய விதிகள் அமலுக்கு வரும் என்பதால், அதற்குள் இந்திய அரசு தூதரக ரீதியாக தீர்வு காணுமா என்பது முதலீட்டாளர்கள் கவனிக்க வேண்டிய மிக முக்கிய விஷயமாகும். இந்த சிக்கல் நீடித்தால், இந்திய மெட்டல் நிறுவனங்களின் உற்பத்தி செலவு அதிகரிப்பது தவிர்க்க முடியாததாகிவிடும்.