இந்தியாவின் டிஃபன்ஸ் துறையில் Emkay Global நிறுவனம் தனது முதலீட்டு ஆய்வை (Coverage) தொடங்கியுள்ளது. உள்நாட்டு உற்பத்தி மற்றும் ஏற்றுமதி வளர்ச்சியால் இந்த துறை பெரும் முன்னேற்றத்தை சந்தித்து வரும் நிலையில், Hindustan Aeronautics மற்றும் Bharat Electronics ஆகிய நிறுவனங்கள் முக்கிய இடம்பிடித்துள்ளன.
இந்திய பாதுகாப்புத் துறை (Defence Sector) நீண்டகால வளர்ச்சியை நோக்கி பயணிக்கத் தொடங்கியுள்ளது. கொள்கை மாற்றங்கள் மற்றும் உள்நாட்டு உற்பத்தியை ஊக்குவிக்கும் அரசின் திட்டங்கள் இதற்கு முக்கிய காரணமாக உள்ளன. FY26 நிதியாண்டில் உள்நாட்டு பாதுகாப்புத் துறையின் உற்பத்தி மதிப்பு ₹1.8 லட்சம் கோடி என்ற புதிய உச்சத்தை எட்டியுள்ளது. இது FY21 முதல் 18% என்ற கூட்டு வருடாந்திர வளர்ச்சி விகிதத்தில் (CAGR) உயர்ந்துள்ளது என்பது குறிப்பிடத்தக்கது.
யாருக்கெல்லாம் மவுசு?
Emkay Global தனது ஆய்வில் Hindustan Aeronautics (HAL), Bharat Electronics (BEL), BEML மற்றும் Bharat Dynamics ஆகிய நிறுவனங்களை முக்கிய முதலீட்டுத் தேர்வுகளாகக் குறிப்பிட்டுள்ளது. இறக்குமதியைக் குறைத்து, உள்நாட்டிலேயே தயாரிக்கும் அரசின் புதிய கொள்முதல் கொள்கை இந்த நிறுவனங்களுக்குப் பெரும் லாபத்தை ஈட்டித் தரும் என எதிர்பார்க்கப்படுகிறது.
ஏற்றுமதியைப் பொறுத்தவரை, FY14-ல் வெறும் ₹690 கோடியாக இருந்த ஏற்றுமதி, FY26-ல் ₹38,000 கோடியாகப் பல மடங்கு அதிகரித்துள்ளது. இந்தியா உலகளாவிய பாதுகாப்பு உற்பத்தி மையமாக உருவெடுப்பதற்கான தெளிவான அறிகுறி இது.
முதலீட்டாளர்கள் கவனத்திற்கு!
பாதுகாப்புத் துறை பங்குகள் அனைத்திலும் ஒரே மாதிரியான ஏற்றம் இல்லை. MTAR Technologies மற்றும் Paras Defence போன்ற பங்குகள் சிறப்பாகச் செயல்படும் அதே வேளையில், Cochin Shipyard போன்ற பங்குகள் சில திருத்தங்களை (Correction) சந்தித்துள்ளன.
முதலீட்டாளர்கள் இதைக் கவனிக்க வேண்டும்:
- ஆர்டர் எக்ஸிகியூஷன்: நீண்ட கால புராஜெக்டுகள் என்பதால், கம்பெனிகள் கையில் உள்ள ஆர்டர்களை எவ்வளவு வேகமாகவும் திறமையாகவும் முடிக்கின்றன என்பதுதான் முக்கியம்.
- வருவாய் இலக்கு: 2029-க்குள் ஆண்டு உற்பத்தியை ₹3 லட்சம் கோடியாக உயர்த்த அரசு இலக்கு நிர்ணயித்துள்ளது. இதைப் பூர்த்தி செய்ய நிறுவனங்கள் தங்களது லாப வரம்புகளை (Profit Margins) தக்கவைத்துக் கொள்ள வேண்டும்.
- valuation அபாயம்: பல டிஃபன்ஸ் பங்குகள் அதிக விலையில் வர்த்தகமாகின்றன. எனவே, திட்டங்களை முடிப்பதில் ஏற்படும் தாமதம் அல்லது புதிய ஆர்டர்கள் கிடைப்பதில் சுணக்கம் ஏற்பட்டால், அது ஷேர் விலையில் தாக்கத்தை ஏற்படுத்தலாம்.