UPI பயனர்களுக்கு எச்சரிக்கை: 'Fake Refund' மோசடியால் பணம் கரையலாம், ஜாக்கிரதை!

மோசடி எப்படி நடக்கிறது?

முதலில் மோசடி செய்பவர்கள் உங்கள் அக்கவுண்டிற்கு ஒரு குறிப்பிட்ட தொகையை அனுப்புவார்கள். உடனே போன் செய்து, 'தவறுதலாக பணம் அனுப்பிவிட்டேன், தயவுசெய்து திருப்பி அனுப்பிவிடுங்கள்' என்று உங்களை பதற்றமடைய வைப்பார்கள். இந்த இக்கட்டான சூழ்நிலையில், அவர்கள் ஒரு QR கோடு அல்லது லிங்க் அனுப்பி, 'இதில் பணம் அனுப்புங்கள்' என்று சொல்வார்கள்.

நீங்கள் அந்த QR கோடை ஸ்கேன் செய்து உங்கள் UPI PIN-ஐ உள்ளிட்டால், உங்கள் கணக்கிலிருந்து பணம் அவர்களது கணக்கிற்கு சென்றுவிடும். முக்கியமாக கவனிக்க வேண்டியது: பணம் பெறுவதற்கு ஒருபோதும் PIN தேவைப்படாது. PIN என்பது பணம் அனுப்புவதற்கு மட்டுமே என்பதை எப்போதும் நினைவில் கொள்ளுங்கள்.

வங்கி அதிகாரிகள் சொல்வது என்ன?

உங்கள் கணக்கிற்கு அடையாளம் தெரியாத நபர்களிடமிருந்து பணம் வந்தால், அவர்களுடன் பேச வேண்டாம். உங்கள் வங்கியின் அதிகாரப்பூர்வ ஆப்-ல் பரிவர்த்தனையை உறுதி செய்யுங்கள். தவறுதலாக வந்த பணத்தை நீங்களாகவே திருப்பியளிக்க முயற்சிக்காதீர்கள். சம்பந்தப்பட்ட வங்கியின் கஸ்டமர் கேர்-ஐ தொடர்பு கொண்டு முறையான முறையில் (Formal Reversal) பணத்தை திருப்பி அனுப்பச் சொல்லுங்கள். இது உங்களுக்கு சட்டப்பூர்வ பாதுகாப்பை தரும்.

மோசடியில் சிக்கிவிட்டால் என்ன செய்வது?

நீங்கள் இந்த மோசடியில் சிக்கியதாக சந்தேகித்தால், உடனடியாக அந்த நபருடன் தொடர்பைத் துண்டியுங்கள். தாமதிக்காமல் 1930 என்ற தேசிய சைபர் கிரைம் ஹெல்ப்லைன் எண்ணிற்கு அழையுங்கள் அல்லது cybercrime.gov.in இணையதளத்தில் புகார் செய்யுங்கள். உடனடியாக உங்கள் வங்கியை தொடர்பு கொண்டு கணக்கை தற்காலிகமாக முடக்கி (Freeze), பண இழப்பைத் தவிர்க்க நடவடிக்கை எடுங்கள்.