SBICAP Securities மற்றும் Appreciate Broking நிறுவனம் இணைந்து இந்திய முதலீட்டாளர்களுக்கு அமெரிக்க சந்தையில் முதலீடு செய்யும் வாய்ப்பை வழங்குகின்றன. இனி GIFT City மூலம் **8,000**-க்கும் மேற்பட்ட பங்குகள் மற்றும் ETFs-களை **$1** முதலீட்டில் இருந்தே வாங்கலாம்.
இந்தியாவின் முன்னணி வங்கியான State Bank of India-வின் கிளை நிறுவனமான SBICAP Securities, இனி உலகளாவிய சந்தைகளுக்கு நேரடி அணுகலை வழங்குகிறது. மும்பையில் நடந்த Global Fintech Fest-ல், SBI சேர்மன் சல்லா ஸ்ரீனிவாசுலு செட்டி இந்த புதிய முயற்சியை அதிகாரப்பூர்வமாக தொடங்கி வைத்தார். இது குஜராத்தில் உள்ள GIFT City-ன் ஒழுங்குமுறை கட்டமைப்பைப் பயன்படுத்தி, இந்தியர்கள் அமெரிக்க பங்குகளில் முதலீடு செய்வதை எளிதாக்குகிறது.
சிறு முதலீட்டாளர்களுக்கு இது ஒரு வரப்பிரசவம்
இந்த தளத்தின் சிறப்பம்சமே 'Fractional Investing' எனப்படும் முறைதான். அதாவது, விலை உயர்ந்த அமெரிக்க பங்குகளை முழுமையாக வாங்கத் தேவையில்லை. வெறும் $1 முதலீட்டில் கூட பங்குகளை வாங்கிச் சேர்க்கலாம். இது சிறிய முதலீட்டாளர்களுக்கு ஒரு பெரும் வாய்ப்பாகப் பார்க்கப்படுகிறது.
எப்படி செயல்படுகிறது?
India INX மற்றும் NSE International Exchange ஆகியவற்றுடன் இந்த தளம் ஒருங்கிணைக்கப்பட்டுள்ளது. இதில் KYC செயல்முறை மிக எளிதாக மாற்றப்பட்டுள்ளது. முதலீடு செய்யப்படும் அனைத்து பங்குகளும் சர்வதேச தரத்திலான கஸ்டடியன் பாதுகாப்பில் இருக்கும், மேலும் இது IFSCA-வின் கண்காணிப்பில் இயங்கும்.
முதலீட்டாளர்கள் கவனத்திற்கு!
இந்த முதலீடுகள் அனைத்தும் ரிசர்வ் வங்கியின் Liberalised Remittance Scheme (LRS) விதிகளுக்கு உட்பட்டவை. முதலீட்டாளர்கள் தங்கள் வருடாந்திர வரம்புகளை கவனத்தில் கொள்ள வேண்டும். மேலும், வெளிநாட்டுப் பண பரிமாற்றத்திற்கு TCS (Tax Collected at Source) வரி விதிப்பு உண்டு.
முக்கியமாக, இது டாலர் சார்ந்த முதலீடு என்பதால், அமெரிக்க டாலருக்கு நிகரான இந்திய ரூபாயின் மதிப்பில் ஏற்படும் மாற்றங்கள் உங்கள் லாபத்தை பாதிக்கலாம். எனவே, முதலீடு செய்வதற்கு முன் இந்த நாணய அபாயங்களை (Currency Risk) கருத்தில் கொள்வது அவசியம்.