இரண்டு ஆண்டுகளுக்கும் மேலாக பயன்பாட்டில் இல்லாத வங்கிக் கணக்குகளை மீண்டும் செயல்படுத்துவதை எளிதாக்க Reserve Bank of India புதிய வழிகாட்டுதல்களை வெளியிட்டுள்ளது. இனி வாடிக்கையாளர்கள் எவ்வித கட்டணமும் இன்றி எந்தவொரு கிளையிலும் அல்லது வீடியோ முறை மூலமாகவோ KYC சரிபார்ப்பை முடித்து கணக்கை இயக்கலாம்.
2 ஆண்டுகளுக்கு மேலாக எந்த பரிவர்த்தனையும் நடக்காத வங்கிக் கணக்குகள் 'Inoperative' என வகைப்படுத்தப்படுகின்றன. இது வாடிக்கையாளர்களுக்கு எதிரான நடவடிக்கை அல்ல, மாறாக மோசடிகளைத் தடுக்க வங்கி அமைப்புகள் எடுக்கும் ஒரு பாதுகாப்பான நடவடிக்கையாகும். இக்கணக்குகளில் உள்ள பணம் பாதுகாப்பாக இருப்பதுடன், தொடர்ந்து வட்டியையும் ஈட்டும்.
இனி ஹோம் பிராஞ்ச் செல்லத் தேவையில்லை!
முன்பு போல கணக்கு தொடங்கிய கிளையையே தேடிச் செல்ல வேண்டிய அவசியம் இல்லை. புதிய விதிகளின்படி, வாடிக்கையாளர்கள் தங்களுக்கு வசதியான எந்தவொரு வங்கி கிளையிலும் சென்று KYC சரிபார்ப்பை முடித்துக் கொள்ளலாம். ஆன்லைனில் வீடியோ மூலம் சரிபார்க்கும் வசதி (V-CIP) கொண்ட வங்கிகளில் இந்த சேவையை டிஜிட்டல் முறையிலும் செய்துகொள்ளலாம்.
கட்டணம் கிடையாது!
இந்த கணக்குகளை மீண்டும் செயல்பாட்டிற்கு கொண்டுவர வங்கிகள் எந்தவித கட்டணமும் வசூலிக்கக்கூடாது என RBI கண்டிப்புடன் கூறியுள்ளது. அனைத்து ஆவணங்களையும் சமர்ப்பித்த 3 வேலை நாட்களுக்குள் வங்கி கணக்கை முழுமையாகச் செயல்படுத்த வேண்டும்.
10 ஆண்டுகளுக்கு மேல் உள்ள பணம் என்னவாகும்?
ஒரு கணக்கு 10 ஆண்டுகளுக்கு மேலாக பயன்படுத்தப்படாமல் இருந்தால், அதில் உள்ள பணம் 'Unclaimed Deposit' ஆகக் கருதப்பட்டு, RBI-ன் DEAF (Depositor Education and Awareness Fund) நிதியத்திற்கு மாற்றப்படும். உங்கள் பணம் தொலைந்துவிட்டது என்று அர்த்தமல்ல; நீங்கள் எப்போதும் அதை உரிமை கோரலாம். இதற்காக மத்திய வங்கி UDGAM என்ற பிரத்யேக ஆன்லைன் போர்ட்டலை உருவாக்கியுள்ளது. இதில் உங்கள் கணக்கு விவரங்களை எளிதாகக் கண்டறியலாம். ஒருவேளை வங்கி உங்கள் கோரிக்கையை ஏற்க மறுத்தால், RBI-ன் Integrated Ombudsman Scheme மூலம் நீங்கள் புகார் அளிக்கலாம்.