அக்டோபர் 1 முதல், Freelancers மற்றும் சேவை ஏற்றுமதியாளர்கள் வெளிநாட்டு பணப் பரிமாற்றங்களுக்கு 'Export Declaration Form' (EDF) சமர்ப்பிக்க வேண்டும் என RBI உத்தரவிட்டுள்ளது.
இந்திய ரிசர்வ் வங்கி (RBI) சேவை ஏற்றுமதியாளர்களுக்காக புதிய விதிமுறைகளை அமல்படுத்தியுள்ளது. Freelancers, ஆலோசகர்கள் மற்றும் ஒப்பந்ததாரர்கள் இனி வெளிநாட்டிலிருந்து வரும் ஒவ்வொரு பணப் பரிமாற்றத்திற்கும் தங்கள் அங்கீகரிக்கப்பட்ட வங்கிகளில் Export Declaration Form (EDF) தாக்கல் செய்வது கட்டாயமாக்கப்பட்டுள்ளது. வெளிநாட்டுப் பணப்புழக்கத்தைக் கண்காணிக்கவும், சட்டவிரோதப் பணப் பரிமாற்றத்தைத் தடுக்கவும் இந்த நடவடிக்கை எடுக்கப்பட்டுள்ளது.
எப்படிச் சமர்ப்பிப்பது?
ஒரே மாதத்தில் வரும் அனைத்து இன்வாய்ஸ்களையும் (Invoices) ஒருங்கிணைத்து, அந்த மாதம் முடிந்த 30 நாட்களுக்குள் இந்த படிவத்தை சமர்ப்பிக்கலாம். பணம் வருவதற்கு முன்பே இந்த EDF-ஐ பூர்த்தி செய்வது, வருங்காலத்தில் வங்கி கணக்கு மற்றும் வரி தணிக்கைகளில் (Audits) எந்தச் சிக்கலும் வராமல் இருக்க உதவும். Export Data Processing and Monitoring System (EDPMS)-ல் தகவல்கள் சரியாகப் பொருந்தவில்லை என்றால், உங்கள் இன்வாய்ஸ்கள் நிலுவையில் உள்ளதாகவே கருதப்படும்.
வங்கிகளின் செயல்பாட்டில் வித்தியாசம்
இந்த புதிய மாற்றத்தைச் செயல்படுத்துவதில் வங்கிகளுக்கிடையே பெரிய வேறுபாடு உள்ளது. Axis Bank போன்ற பெரிய வங்கிகள் தங்கள் இணையதளத்திலேயே ஆட்டோமேஷன் வசதிகளைக் கொடுத்துள்ளன. ஆனால், சிறிய மற்றும் பாரம்பரிய வங்கிகளில் இன்னும் பழைய முறையில் காகித ஆவணங்களைச் சமர்ப்பிக்க வேண்டிய நிலை உள்ளது. இது Freelancers-க்கு கூடுதல் வேலைப்பளுவை ஏற்படுத்தியுள்ளது.
சவால்கள் என்ன?
ஏற்கனவே உள்ள GST ரிப்போர்ட்டிங் மற்றும் வங்கிக் குறியீடுகளுடன் (Purpose Codes) இந்த புதிய படிவமும் சேர்வதால், நிர்வாகச் சுமை அதிகரித்துள்ளது. மிகச்சிறிய பணப் பரிமாற்றங்களுக்கு விலக்கு அளிக்கப்படலாம் என்று கூறப்பட்டாலும், அது குறித்த தெளிவான வழிகாட்டுதல்கள் இன்னும் வெளியிடப்படவில்லை. தெளிவான வழிகாட்டுதல் வரும் வரை, உங்கள் வங்கியுடன் தொடர்பில் இருப்பது மட்டுமே தற்போதைக்கு பாதுகாப்பானது.