இந்திய ரிசர்வ் வங்கி (RBI) நிதிச் சந்தைகளின் பணப்புழக்கம் மற்றும் பாதுகாப்பை மேம்படுத்த, 'Technical Consultative Committee for Financial Markets' (TCCFM) எனும் புதிய குழுவை உருவாக்கியுள்ளது. SBI, Axis, ICICI போன்ற முன்னணி வங்கி அதிகாரிகளை உள்ளடக்கிய இந்த குழு, சந்தையில் நிலவும் தொழில்நுட்பத் தடைகளை நீக்க quarterly அடிப்படையில் கூடி ஆலோசிக்கும்.
இந்தியாவின் நிதிச் சந்தைகள், அரசுப் பத்திரங்கள் மற்றும் அந்நிய செலாவணி வர்த்தகம் ஆகியவற்றின் செயல்பாட்டை மேம்படுத்தும் நோக்கில், ரிசர்வ் வங்கி (RBI) அதிகாரப்பூர்வமாக இந்த புதிய குழுவை களமிறக்கியுள்ளது. மத்திய வங்கியின் கொள்கைகளுக்கும், சந்தையில் களப்பணியாற்றும் நிபுணர்களின் அனுபவங்களுக்கும் இடையே ஒரு பாலமாக இந்த குழு செயல்படும்.
சந்தை திறனை மேம்படுத்துதல் (Market Efficiency)
இந்திய நிதிச் சந்தைகள் திடீர் பொருளாதார அதிர்ச்சிகளைத் தாங்கும் வலிமையுடன் இருக்க வேண்டும் என்பதே இந்த குழுவின் முக்கிய நோக்கம். சந்தை வர்த்தகம், செட்டில்மெண்ட் மற்றும் கிளியரிங் அமைப்புகள் எவ்வாறு செயல்படுகின்றன என்பதை இக்குழு ஆய்வு செய்யும். அதாவது, வர்த்தகத்தின் போது ஏற்படும் தேவையற்ற தாமதங்கள் மற்றும் தொழில்நுட்ப சிக்கல்களைக் (Market Frictions) கண்டறிந்து, அவற்றைச் சரிசெய்வதே இவர்களின் முதன்மை பணி.
இதன் மூலம் சந்தையில் பணப்புழக்கம் (Liquidity) அதிகரிக்கும். இதனால் முதலீட்டாளர்கள் பெரிய விலை மாற்றங்கள் இன்றி தங்களது ஷேர்களை எளிதாக வாங்கவும், விற்கவும் முடியும். மேலும், உலகளாவிய பொருளாதார ஆபத்துகளை முன்கூட்டியே கணிக்கும் ஒரு 'Early-warning system' ஆகவும் இந்த குழு செயல்படும்.
வலுவான நிபுணர்கள் குழு
RBI-இன் துணை கவர்னர் ரோஹித் ஜெயின் (Rohit Jain) தலைமையில் இந்த குழு செயல்படும். சந்தையின் நிலவரங்களை நேரலையாகப் புரிந்துகொள்ள, பொது மற்றும் தனியார் துறை வங்கிகளில் இருந்து பிரதிநிதிகள் சேர்க்கப்பட்டுள்ளனர்.
இதில் State Bank of India, Axis Bank, ICICI Bank, Citibank மற்றும் Clearing Corporation of India Ltd ஆகியவற்றின் உயரதிகாரிகள் இடம்பெற்றுள்ளனர். மேலும், Morgan Stanley India-வின் ரிதம் தேசாய் (Ridham Desai) மற்றும் SEBI-இன் முன்னாள் முழுநேர உறுப்பினர் ஆனந்த் நாராயண் ஆகியோர் இக்குழுவில் இருப்பது, கொள்கை முடிவுகளுக்கு கூடுதல் வலுசேர்க்கும்.
முதலீட்டாளர்கள் கவனிக்க வேண்டியது என்ன?
நிதிச் சந்தையை இன்னும் பாதுகாப்பானதாகவும், நவீனமானதாகவும் மாற்ற எடுக்கப்பட்டிருக்கும் இந்த நடவடிக்கை முதலீட்டாளர்களுக்கு ஒரு நல்ல செய்தி. இந்த குழு ஒவ்வொரு காலாண்டிலும் (Quarterly) கூடி விவாதிக்கும் என்பதால், சந்தையின் செயல்பாடுகளில் அவ்வப்போது மாற்றங்கள் இருக்கும். இந்த குழுவின் பரிந்துரைகளால் வர்த்தகத் தாமதங்கள் குறைந்தால், அது சந்தையின் ஸ்திரத்தன்மைக்கும், முதலீட்டாளர்களின் நம்பிக்கையை அதிகரிப்பதற்கும் நீண்டகால அடிப்படையில் பெரிய உதவியாக இருக்கும்.