UPI பணப்பரிமாற்றத்தில் NPCI முக்கிய மாற்றத்தைக் கொண்டு வரத் திட்டமிட்டுள்ளது. ஆண்டுக்கு ₹1,000 கோடிக்கும் மேல் வருவாய் ஈட்டும் பெரிய நிறுவனங்களுக்கு மட்டும் MDR கட்டணம் வசூலிக்கப்பட வாய்ப்புள்ளது. அதே சமயம், சிறு வியாபாரிகளுக்கும் பொதுமக்களுக்கும் இந்தச் சேவை தொடர்ந்து இலவசமாகவே இருக்கும்.
தேசிய பணப்பரிமாற்றக் கழகம் (NPCI), தனது UPI கட்டமைப்பு மற்றும் சேவை முறைகளில் முக்கிய மாற்றங்களைச் செய்யத் தயாராகி வருகிறது. இது குறித்துப் பேசிய NPCI CEO திலிப் அஸ்பே (Dilip Asbe), சிறு கடைக்காரர்களுக்கும் சாமானிய மக்களுக்கும் சுமை ஏற்படுத்தாமல், பெரிய நிறுவனங்களிடமிருந்து மட்டும் கட்டணம் (MDR) வசூலிக்கும் புதிய நடைமுறை குறித்து ஆய்வு செய்து வருவதாக உறுதிப்படுத்தியுள்ளார்.
கட்டண முறை ஏன் மாறுகிறது?
இதுவரை UPI பரிவர்த்தனைகள் அனைத்தும் கட்டணமில்லாமல் (Zero-MDR) இருந்து வந்தன. இது டிஜிட்டல் பணப்பரிமாற்றம் இந்தியாவில் வேகமாகப் பரவ உதவியது. ஆனால், இந்த உள்கட்டமைப்பைப் பராமரிக்கும் முழுச் செலவையும் வங்கிகளும், பேமெண்ட் நிறுவனங்களும் தாங்க வேண்டிய சூழல் இருந்தது. இந்தச் செலவுகளைச் சரிசெய்யவே, பெரிய நிறுவனங்களுக்கு மட்டும் கட்டணம் விதிக்கும் முறையை NPCI பரிசீலிக்கிறது.
பெரும் நிறுவனங்கள் குறிவைக்கப்படுவது ஏன்?
இந்த புதிய கட்டண முறையினால் சுமார் 80% வருவாய் கிடைக்கும் என எதிர்பார்க்கப்படுகிறது. ஆண்டுக்கு ₹1,000 கோடிக்கும் மேல் வர்த்தகம் செய்யும் பெரிய கார்ப்பரேட் நிறுவனங்கள், ஏற்கனவே கிரெடிட் கார்டு பரிவர்த்தனைகளுக்குக் கட்டணம் செலுத்தப் பழகியவை. ஆனால், 75% சிறு வியாபாரிகளின் பரிவர்த்தனைகள் ₹2,000-க்கும் குறைவாகவே இருப்பதால், அவர்கள் இந்தத் திட்டத்தினால் பாதிக்கப்படமாட்டார்கள்.
முதலீட்டாளர்கள் கவனத்திற்கு
இந்தத் திட்டம் நடைமுறைக்கு வந்தால், வங்கிகள் மற்றும் பேமெண்ட் அக்ரிகேட்டர்களுக்குக் கட்டணம் மூலம் வருவாய் ஈட்டும் வாய்ப்பு (Fee-based income) அதிகரிக்கும். இது நீண்ட காலத்திற்கு டிஜிட்டல் பேமெண்ட் துறையின் வளர்ச்சியை உறுதிப்படுத்தும். அதேசமயம், இக்கட்டணத்தை பெரிய நிறுவனங்கள் எப்படி எதிர்கொள்ளப் போகின்றன என்பது முக்கியமான ஒன்றாகப் பார்க்கப்படுகிறது.
இதோடு சேர்த்து, AI தொழில்நுட்பத்தில் இயங்கும் 'ஏஜென்டிக் பேமெண்ட்ஸ்' (Agentic Payments) வசதியையும் NPCI அறிமுகப்படுத்தவுள்ளது. இது UPI தளத்தை அடுத்த கட்டத்திற்கு எடுத்துச் செல்லும் என எதிர்பார்க்கப்படுகிறது.