NCDEX-ன் புதிய முயற்சி: கிராமப்புற முதலீட்டாளர்களுக்காக 'நிதி' அறிமுகம்!

கிராமப்புற மக்களுக்கு புதிய முதலீட்டு வாய்ப்பு

இந்தியாவின் முன்னணி கமாடிட்டி வர்த்தக நிறுவனமான NCDEX (National Commodity and Derivatives Exchange), இப்போது பங்குச்சந்தை சார்ந்த சேவைகளிலும் கால் பதிக்கிறது. விவசாயப் பொருட்கள் வர்த்தகத்தில் கொடிகட்டிப் பறக்கும் NCDEX, தற்போது 'NCDEX நி ' என்ற பெயரில் மியூச்சுவல் ஃபண்ட் பரிவர்த்தனை தளத்தை (Mutual Fund Transaction Platform) தொடங்கியுள்ளது.

இதன் முக்கிய நோக்கம், இந்தியாவின் கிராமப்புற மற்றும் சிறு நகரங்களில் நிதிச் சேவைகள் சரியாகச் சென்றடையாத பகுதிகளில், மியூச்சுவல் ஃபண்ட் முதலீடுகளை எளிதாக்குவதாகும். தற்போதுள்ள விவசாய சமுதாயத்தையும், விவசாய உற்பத்தியாளர் அமைப்புகளின் (FPO - Farmer Producer Organizations) கூட்டமைப்பையும் பயன்படுத்தி, இதுவரை நிதிச் சந்தைகளில் அதிகம் ஈடுபடாத கோடிக்கணக்கான மக்களை முதல் முறை முதலீட்டாளர்களாக (First-time Investors) மாற்ற NCDEX இலக்கு வைத்துள்ளது.

முன்னணி AMC-களின் ஆதரவு

இந்தத் திட்டத்திற்காக, NCDEX ஏற்கனவே ஆறு முன்னணி அசட் மேனேஜ்மென்ட் நிறுவனங்களுடன் (Asset Management Companies - AMCs) கைகோர்த்துள்ளது. Nippon India Mutual Fund, HDFC Mutual Fund, Axis Mutual Fund, LIC Mutual Fund, Tata Mutual Fund, மற்றும் Invesco Mutual Fund ஆகியவை இதில் அடங்கும். மேலும், இந்த ஆகஸ்ட் மாத இறுதிக்குள் மேலும் சுமார் 20 AMC-கள் இந்த தளத்தில் இணையும் என எதிர்பார்க்கப்படுகிறது. இதனால், கிராமப்புற முதலீட்டாளர்களுக்குப் பலவிதமான முதலீட்டுத் தேர்வுகள் கிடைக்கும்.

உள்ளூர் பிரதிநிதிகள் மூலம் ஊக்குவிப்பு

NCDEX-ன் திட்டத்தின் முக்கிய அம்சம், ஒரு வலுவான உள்ளூர் விநியோக வலையமைப்பை (Distribution Network) உருவாக்குவதாகும். இதற்காக, 20 FPO-க்களில் உள்ள உறுப்பினர்களுக்கு, நேஷனல் இன்ஸ்டிடியூட் ஆஃப் செக்யூரிட்டிஸ் மார்க்கெட்ஸ் (NISM) தேர்வுகளில் தேர்ச்சி பெற வைத்து, சான்றளிக்கப்பட்ட மியூச்சுவல் ஃபண்ட் விநியோகஸ்தர்களாக (Certified Mutual Fund Distributors) பயிற்சி அளித்துள்ளது. வங்கி மற்றும் தரகு சேவைகள் குறைவாக உள்ள பகுதிகளில், இந்த உள்ளூர் பிரதிநிதிகள் கிராம மக்களுக்கு வழிகாட்டியாகச் செயல்படுவார்கள்.

எளிமையான தொழில்நுட்ப அம்சங்கள்

தொழில்நுட்ப ரீதியாகவும், இந்தப் புதிய தளம் பயனர்களுக்கு மிகவும் எளிமையாக இருக்கும் வகையில் வடிவமைக்கப்பட்டுள்ளது. சிஸ்டமேட்டிக் இன்வெஸ்ட்மென்ட் பிளான் (SIP) முறைகளுக்கு UPI AutoPay வசதி, பரிவர்த்தனை நிராகரிப்பு குறித்த தெளிவான செய்திகள், முதலீட்டாளர்கள் தங்களுக்கு விருப்பமான SIP தேதி தேர்வுகள் போன்ற அம்சங்கள் இதில் உள்ளன. இதனால், நிதிச் சந்தைகளில் புதியவர்களுக்கு ஏற்படும் சிரமங்கள் குறையும்.

NCDEX-க்கு இது ஒரு புதிய வணிகப் பிரிவு என்றாலும், இந்த முயற்சி கிராமப்புறங்களில் சந்தையை விரிவுபடுத்தும் ஒரு கருவியாகவே பார்க்கப்படுகிறது. இந்தத் தளம் எந்த அளவுக்கு கிராமப்புற மக்களால் ஏற்றுக்கொள்ளப்படுகிறது என்பதையும், FPO விநியோகஸ்தர்கள் மூலம் எவ்வளவு சிறப்பாக இதை விரிவுபடுத்த முடியும் என்பதையும் பொறுத்தே இதன் வெற்றி அமையும்.