இன்சூரன்ஸ் நிறுவனங்கள் வழங்கும் 'Instant Claim Payout' என்பது உடனடி நிவாரணமாகத் தெரிந்தாலும், இதில் பல நிபந்தனைகள் உள்ளன. இது இறுதி செட்டில்மென்ட் அல்ல, ஒரு அட்வான்ஸ் மட்டுமே என்பதைப் புரிந்துகொள்வது அவசியம்.
பல இன்சூரன்ஸ் நிறுவனங்கள் தற்போது 24 முதல் 48 மணி நேரத்திற்குள் பணத்தை விடுவிப்பதாக விளம்பரப்படுத்துகின்றன. இறுதிச் சடங்குகள் மற்றும் மருத்துவச் செலவுகளுக்கு இது உதவியாகத் தெரிந்தாலும், இது 'முன்பணம்' (Advance) மட்டுமே என்பதை பாலிசிதாரர்கள் கவனத்தில் கொள்ள வேண்டும்.
அட்வான்ஸ் vs இறுதி செட்டில்மென்ட்
இந்தத் தொகை பாலிசியின் மொத்த காப்பீட்டுத் தொகையிலிருந்து கழிக்கப்படும். ஒருவேளை, ஆவணங்களில் குளறுபடி இருந்தாலோ அல்லது பாலிசி எடுக்கும்போது மருத்துவக் குறிப்புகளை மறைத்திருந்தாலோ, அந்த கிளைம் நிராகரிக்கப்படலாம். அப்படிப்பட்ட சூழலில், ஏற்கனவே வழங்கப்பட்ட அட்வான்ஸ் தொகையைத் திரும்பக் கோர நிறுவனங்களுக்குச் சட்டப்படி உரிமை உண்டு.
கவனிக்க வேண்டிய சவால்கள்:
- கிளைம் விசாரணை: பாலிசி தொடங்கி 3 ஆண்டுகளுக்குள் நடக்கும் மரணங்களுக்கு நிறுவனங்கள் மிக விரிவான விசாரணையை மேற்கொள்ளும்.
- ஆவணங்கள்: 'உடனடி' என்று சொன்னாலும், இறப்புச் சான்றிதழ் மற்றும் அடையாள ஆவணங்கள் சரியாகச் சமர்ப்பிக்கப்பட்டால் மட்டுமே இந்தச் செயல்முறை தொடங்கும்.
- நிபந்தனைகள்: பல பாலிசிகளில் இந்த வசதியைப் பெற 1 முதல் 3 ஆண்டுகள் காத்திருப்பு காலம் மற்றும் குறைந்தபட்ச பாலிசித் தொகை போன்ற விதிமுறைகள் உள்ளன.
நெருக்கடியான நேரத்தில் நிதிச் சுமையைத் தவிர்க்க, வெறும் இன்சூரன்ஸ் கிளைமை மட்டும் நம்பியிருக்காமல், குடும்பத்திற்குத் தனியாக ஒரு எமர்ஜென்சி ஃபண்ட் (Emergency Fund) வைத்திருப்பது மிக முக்கியம்.