InterGlobe Aviation தனது 8 புதிய Airbus விமானங்களை வாங்க GIFT IFSC மூலம் **$328 மில்லியன்** நிதி ஒப்பந்தத்தை முடித்துள்ளது. இது விமானங்களை குத்தகைக்கு (Lease) எடுக்கும் வழக்கமான முறையிலிருந்து, சொந்தமாக வாங்கும் புதிய உத்திக்கு நிறுவனம் மாறியுள்ளதை காட்டுகிறது.
விமானப் போக்குவரத்துத் துறையில் ஒரு முக்கிய மைல்கல்லாக, InterGlobe Aviation நிறுவனம் தனது 8 Airbus விமானங்களை வாங்குவதற்காக $328 மில்லியன் நிதி தொகுப்பை வெற்றிகரமாக முடித்துள்ளது. இதில் 6 A321 மாடல்களும், 2 A320 மாடல்களும் அடங்கும். இது இந்தியாவுக்குள்ளேயே, குறிப்பாக குஜராத்தின் GIFT IFSC வழியாக எக்ஸ்போர்ட் கிரெடிட் ஏஜென்சி காப்பீட்டைப் பயன்படுத்தி மேற்கொள்ளப்பட்ட முதல் பெரிய விமான நிதி பரிவர்த்தனை ஆகும்.
இந்த டீலின் பின்னணி
இந்த ஒப்பந்தத்தை Citi நிறுவனம் ஒருங்கிணைத்துள்ளது. பெல்ஜியத்தைச் சேர்ந்த Credendo நிறுவனம் இதற்கான கடன் காப்பீட்டு ஆதரவை வழங்கியுள்ளது. தனது துணை நிறுவனமான InterGlobe Aviation Financial Services IFSC Private Ltd மூலம், சர்வதேச மூலதன சந்தையில் இருந்து விமானங்களை வாங்குவதற்கான புதிய வழியை இண்டிகோ கண்டறிந்துள்ளது. ஏற்கனவே 2025 இறுதியில், தனது துணை நிறுவனத்திற்கு $820 மில்லியன் முதலீடு செய்ய இண்டிகோ வாரியம் ஒப்புதல் அளித்திருந்தது, அதன் தொடர்ச்சியே இந்த நடவடிக்கை.
முதலீட்டாளர்கள் கவனிக்க வேண்டியது என்ன?
வழக்கமாக இந்திய விமான நிறுவனங்கள் விமானங்களை குத்தகைக்கு எடுத்து (Leasing) தங்களின் பேலன்ஸ் ஷீட்டை எளிமையாக வைத்திருக்கும். ஆனால், இப்போது சொந்தமாக விமானங்களை வாங்கும் போது, மாதாந்திர வாடகைக்குப் பதிலாக, வட்டி மற்றும் தேய்மானம் (Depreciation) செலவுகள் பேலன்ஸ் ஷீட்டில் சேரும்.
- சாதகங்கள்: டாலர் அடிப்படையில் செலுத்த வேண்டிய அதிகப்படியான வாடகை செலவுகள் குறையும்.
- சவால்கள்: கடன் வாங்குவதால் வட்டிச் சுமை கூடும். விமான நிதி பரிவர்த்தனைகள் அந்நிய செலாவணியில் நடப்பதால், ரூபாய் மதிப்பு மாறுபாடுகளால் ஏற்படும் ரிஸ்க்குகளை நிறுவனம் கையாள வேண்டும்.
தற்போதைய சூழலில், அதிக எரிபொருள் விலை மற்றும் கடுமையான சந்தைப் போட்டிக்கு மத்தியில், இந்த புதிய நிதி கட்டமைப்பு நிறுவனத்தின் லாபத்தை (Margins) எப்படி மாற்றும் என்பதை வரும் காலாண்டு முடிவுகளில் நாம் கவனிக்க வேண்டும்.