வருமான வரி ரிட்டர்ன் தாக்கல் செய்யும் காலக்கெடு முடிந்த பிறகும், India-Singapore DTAA அடிப்படையில் மியூச்சுவல் ஃபண்ட் முதலீட்டிற்கு வரி ரீஃபண்ட் கோரலாம் என ITAT Pune உத்தரவிட்டுள்ளது.
புனேவில் உள்ள வருமான வரி மேல்முறையீட்டு தீர்ப்பாயம் (ITAT), வரி செலுத்தும் NRI ஒருவருக்கு முக்கிய நிவாரணத்தை வழங்கியுள்ளது. பொதுவாக, வருமான வரி ரிட்டர்னை திருத்தம் (Revise) செய்வதற்கான காலக்கெடு முடிந்த பிறகு, எந்தவொரு புதிய கோரிக்கையையும் ஏற்க முடியாது என்று துறை அதிகாரிகள் மறுத்து வந்தனர். ஆனால், இந்த வழக்கில் ₹1.70 லட்சம் மதிப்புள்ள மியூச்சுவல் ஃபண்ட் லாபத்திற்கான வரி சலுகையை கோர அனுமதி அளிக்கப்பட்டுள்ளது.
சட்ட முன்னுதாரணம் (Legal Precedent)
மும்பை உயர்நீதிமன்றத்தின் 'CIT versus Pruthvi Brokers & Shareholders' தீர்ப்பை ஆதாரமாகக் கொண்டு, மேல்முறையீட்டு அதிகாரிகள் வரி செலுத்துவோர் முன்வைக்கும் புதிய கோரிக்கைகளை பரிசீலிக்க சட்டப்படி அதிகாரம் உண்டு என்பதை ITAT உறுதிப்படுத்தியுள்ளது. அதாவது, ஆரம்ப ரிட்டர்னில் குறிப்பிடாத விஷயங்களைக்கூட மேல்முறையீட்டு செயல்முறையின் போது வாதிடலாம்.
அடுத்தகட்ட நடவடிக்கை என்ன?
இந்த தீர்ப்பு கிடைத்தவுடன் ரீஃபண்ட் கிடைத்துவிடாது. தீர்ப்பாயம் இந்த வழக்கை மீண்டும் சம்பந்தப்பட்ட அதிகாரியிடம் (Assessing Officer) அனுப்பியுள்ளது. அங்கு வரி செலுத்துபவரின் குடியிருப்பு அந்தஸ்து (Residency Status) மற்றும் இந்தியா-சிங்கப்பூர் வரி ஒப்பந்தத்தின் பிரிவு 13(5)-ன் கீழ் முதலீட்டு விவரங்கள் சரிபார்க்கப்படும்.
முதலீட்டாளர்கள் தகுந்த ஆவணங்களான Tax Residency Certificate (TRC) மற்றும் பரிவர்த்தனை அறிக்கைகளைச் சமர்ப்பித்தால் மட்டுமே இந்த பலனைப் பெற முடியும். எனவே, ஆவணங்களை முறையாக பராமரிப்பது அவசியம் என்று நிபுணர்கள் அறிவுறுத்துகின்றனர்.