2027-ம் நிதியாண்டில் இந்திய வங்கிகளில் புதிய வராக்கடன் (Fresh Bad Loans) அதிகரிக்கக்கூடும் என்று ICRA கணித்துள்ளது. முக்கியமாக அன்செக்யூர்டு ரீடைல் லோன் மற்றும் MSME துறைகளில் இந்த அழுத்தம் அதிகமாக இருக்கும் எனத் தெரிகிறது.
இந்திய வங்கிகள் தங்களின் சொத்துத் தரத்தில் (Asset Quality) சற்று கவனமாக இருக்க வேண்டிய காலக்கட்டம் வரவுள்ளது. கிரெடிட் ரேட்டிங் நிறுவனமான ICRA-வின் சமீபத்திய அறிக்கைப்படி, 2026-27 நிதியாண்டில் வங்கிகளுக்கு புதிய வராக்கடன்கள் (NPAs) அதிகரிக்கும் சூழல் உருவாகியுள்ளது.
எங்கு அழுத்தம் அதிகம்?
இந்த வராக்கடன் உயர்வு அனைத்து வங்கிகளுக்கும் ஒரே சீராக இருக்காது. தனியார் வங்கிகளில் 1.4% ஆக இருந்த 'Fresh Slippage' விகிதம், 1.6% ஆக உயரக்கூடும் என கணிக்கப்பட்டுள்ளது. இது பண மதிப்பில் சுமார் ₹1.3 லட்சம் கோடி ஆகும். அதேபோல், பொதுத்துறை வங்கிகளில் இந்த விகிதம் 0.7%-லிருந்து 0.8% ஆக உயரும் என்றும், இதன் மதிப்பு சுமார் ₹1 லட்சம் கோடி என்றும் மதிப்பிடப்பட்டுள்ளது.
சிக்கலுக்கு என்ன காரணம்?
இதற்கு முக்கிய காரணம் அன்செக்யூர்டு ரீடைல் லோன் மற்றும் MSME கடன்கள்தான். அதிக வட்டி விகிதங்கள் மற்றும் பணவீக்கத்தால் சிறு நிறுவனங்கள் மற்றும் தனிநபர்களின் பணப்புழக்கம் (Cash Flow) கடுமையாக பாதிக்கப்பட்டுள்ளது. கடனைத் திருப்பிச் செலுத்தும் திறன் குறைந்ததே இந்த சொத்துத் தர சரிவுக்கு முக்கிய காரணியாகப் பார்க்கப்படுகிறது.
முதலீட்டாளர்கள் பயப்பட வேண்டுமா?
நிபுணர்களின் கருத்துப்படி, இந்திய வங்கித் துறை கடந்த காலத்தை விட இப்போது மிகவும் வலுவாக உள்ளது. வங்கிகள் ஏற்கனவே தங்களின் பேலன்ஸ் ஷீட்களை சுத்தப்படுத்தி, போதிய மூலதன இருப்பைக் கொண்டுள்ளன. எனவே, வராக்கடன்களுக்காக வங்கிகள் ஒதுக்க வேண்டிய நிதி (Credit Costs) அதிகரித்தாலும், அது வங்கி லாபத்தில் ஒரு பெரிய சரிவை ஏற்படுத்தாது. வங்கித் துறை எந்தவொரு பெரிய நெருக்கடியையும் சந்திக்கவில்லை, இது ஒரு கட்டுப்படுத்தப்பட்ட சூழலாகவே இருக்கும்.