HSBC நிறுவனம் தனது துணை நிறுவனமான HSBC InvestDirect Securities மூலம் இந்தியாவில் மீண்டும் பங்குத் தரகு (Equity Broking) தொழிலைத் தொடங்க உள்ளது. அதிகரித்து வரும் சில்லறை முதலீட்டாளர்களின் ஆர்வத்தைப் பயன்படுத்தி, பெரும் வர்த்தகத்தை ஈர்க்க இந்த வங்கி திட்டமிட்டுள்ளது.
13 வருட இடைவெளிக்கு பின் ஒரு கம்பேக்
கடந்த 2013-ம் ஆண்டு தனது சில்லறை வர்த்தக சேவைகளை இந்தியாவில் நிறுத்தியிருந்த HSBC, தற்போது மீண்டும் பங்குச் சந்தை வர்த்தகத்தில் கால்பதிக்கிறது. இதற்காக, தனக்கு ஏற்கனவே சொந்தமான HSBC InvestDirect Securities (India) Private Limited என்ற நிறுவனத்தைப் பயன்படுத்த உள்ளது. புதிய உரிமங்களுக்காகக் காத்திருக்காமல், ஏற்கனவே உள்ள கட்டமைப்பை வைத்து டிஜிட்டல் டிரேடிங் வசதிகளை மிக விரைவில் அறிமுகப்படுத்த வங்கி திட்டமிட்டுள்ளது.
சந்தையில் HSBC-ன் வியூகம்
இந்தியாவில் அதிக பேலன்ஸ் ஷீட் கொண்ட வெளிநாட்டு வங்கியாகத் திகழும் HSBC, இதர வங்கிகளைப் போல தனது சேவைகளைக் குறைத்துக் கொள்ளாமல், மாறாக விரிவாக்கம் செய்து வருகிறது. சமீபத்தில் இந்தியா முழுவதும் 20 புதிய கிளைகளைத் திறக்க அனுமதி பெற்றுள்ளதோடு, GIFT சிட்டியிலும் தனது முதலீட்டுச் சேவைகளை வலுப்படுத்தி வருகிறது.
போட்டி நிறைந்த மார்க்கெட் - சவால்கள் என்ன?
தற்போதைய இந்திய பங்குச் சந்தை, 2013-ல் இருந்ததை விட முற்றிலும் மாறுபட்டது. டிஜிட்டல் முறையில் குறைந்த கட்டணத்தில் சேவைகளை வழங்கும் பல புரோக்கர்கள் ஏற்கனவே சந்தையை ஆக்கிரமித்துள்ளனர். இந்த சூழலில், HSBC எப்படித் தன்னைத் தக்கவைக்கப் போகிறது என்பதுதான் முக்கியக் கேள்வி.
நிபுணர்களின் கருத்துப்படி, குறைந்த கட்டணத்தை விட, உயர்மட்ட முதலீட்டாளர்களுக்குத் தேவையான Wealth Management, உலகளாவிய முதலீட்டு வாய்ப்புகள் மற்றும் தனித்துவமான ஆலோசனைகளை வழங்குவதன் மூலம் மற்ற புரோக்கர்களிடமிருந்து HSBC தன்னை வேறுபடுத்திக் கொள்ள முயற்சிக்கும். இதற்காக மூத்த நிர்வாகக் குழுவை அமைக்கும் பணிகளும் விறுவிறுப்பாக நடைபெற்று வருகின்றன.