தங்கம் விலை ஜனவரி மாத உச்சமான **₹1.82 லட்சத்திலிருந்து** தற்போது **₹1.53 லட்சமாக** (10 கிராமுக்கு) குறைந்துள்ளது. இதனால் கோல்டு லோன் வாங்கியவர்கள் பெரும் சிக்கலில் உள்ளனர். அடகு வைத்த தங்கத்தின் மதிப்பு குறைந்ததால், வங்கிகள் மற்றும் நிதி நிறுவனங்கள் மார்ஜின் கால் (Margin Call) கேட்டு வாடிக்கையாளர்களுக்கு அழுத்தம் கொடுக்கத் தொடங்கியுள்ளன.
LTV ரேஷியோ பாதிப்பு
கோல்டு லோன் துறையில் தற்போது பதற்றமான சூழல் நிலவுகிறது. ஒரு பயனாளி அடகு வைத்த நகையின் மதிப்பில், வங்கி அல்லது நிதி நிறுவனம் (NBFC) எவ்வளவு கடன் கொடுக்கலாம் என்பதை நிர்ணயிப்பதுதான் Loan-to-Value (LTV) ரேஷியோ. உதாரணமாக, ₹10 லட்சம் மதிப்புள்ள தங்கத்திற்கு ₹7 லட்சம் கடன் பெற்றிருந்தால், அது 70% LTV. RBI விதிகளின்படி, ₹5 லட்சத்திற்கு அதிகமான கடன்களுக்கு LTV உச்சவரம்பு 75% ஆக நிர்ணயிக்கப்பட்டுள்ளது.
தங்கம் விலை குறையும் போது, கடனின் மதிப்பு மாறாமல் இருக்கும், ஆனால் அடகு பொருளின் மதிப்பு குறைந்து LTV விகிதம் தானாகவே உயர்ந்துவிடும். இந்த விகிதம் RBI அல்லது வங்கி நிர்ணயித்த எல்லையைத் தாண்டினால், உடனடியாக 'மார்ஜின் கால்' விடுக்கப்படும். அதாவது, கூடுதல் பணம் அல்லது கூடுதல் தங்கம் வைக்கும்படி வங்கி நோட்டீஸ் அனுப்பும்.
புல்லட் ரீபேமெண்ட் (Bullet Repayment) ஆபத்து
அனைத்து கோல்டு லோன்களுக்கும் ஒரே மாதிரியான ஆபத்து இல்லை. குறிப்பாக, காலத்தின் இறுதியில் வட்டி மற்றும் அசலை மொத்தமாக செலுத்தும் 'புல்லட் ரீபேமெண்ட்' திட்டத்தில் கடன் வாங்கியவர்களுக்குத்தான் அதிக ரிஸ்க். இவர்களுக்கு அசலில் எந்தக் குறைப்பும் இல்லாததால், தங்கத்தின் விலை குறையும் போது பாதுகாப்பு கவசம் (Buffer) இல்லாமல் போகிறது. இதற்கு மாறாக, மாதந்தோறும் EMI செலுத்தும் கடன்கள் ஓரளவுக்கு பாதுகாப்பானவை, ஏனெனில் அசல் குறையக் குறைய LTV விகிதமும் குறையும்.
எச்சரிக்கை என்ன?
நிதி நிறுவனங்கள் தற்போது மிகவும் கவனமாகச் செயல்படுகின்றன. பல வங்கிகள் ரிசர்வ் வங்கியின் வரம்பை விட 5% முதல் 10% வரை குறைவான LTV-யையே பராமரிக்கின்றன. ஆனாலும், உச்ச விலையில் கடன் வாங்கியவர்களுக்குப் பாதிப்பு அதிகம். ஒருவேளை மார்ஜின் கால் அழைப்பு வந்தும், வாடிக்கையாளர்கள் கூடுதல் பணம் செலுத்தத் தவறினால், அடகு வைத்த நகைகளை ஏலம் விடுவதற்கு வங்கிகளுக்கு சட்டப்படி உரிமை உண்டு.
தங்கம் விலை இன்னும் சீராகவில்லை என்பதால், கடன் வாங்கியவர்கள் தங்கள் லோன் ஒப்பந்தங்களை ஒருமுறை சரிபார்த்துக்கொள்வது அவசியம்.