GST கவுன்சிலின் 57-வது கூட்டத்தில் வணிக நிறுவனங்களுக்கு பெரிய நிம்மதி அளிக்கும் வகையில் வரி நடைமுறைகள் எளிமையாக்கப்பட்டுள்ளன. கைது நடவடிக்கைகளுக்கு புதிய கட்டுப்பாடுகள் மற்றும் நிறுவனங்களுக்கான புதிய வரி சலுகைகள் அறிவிக்கப்பட்டுள்ளன.
கைது அதிகாரத்திற்கு இனி கட்டுப்பாடு
இந்த கூட்டத்தின் மிக முக்கியமான அறிவிப்பாக, வரி அதிகாரிகளின் நேரடி கைது அதிகாரங்கள் (Arrest Powers) கட்டுப்படுத்தப்பட்டுள்ளன. இனி வரி அதிகாரிகள் கைது செய்ய வேண்டுமானால், நீதித்துறை அனுமதி (Judicial Authorization) கட்டாயமாக்கப்பட்டுள்ளது. மேலும், கிரிமினல் வழக்குகள் தொடங்குவதற்கான நிதி வரம்பை ₹1 கோடியிலிருந்து ₹5 கோடியாக உயர்த்தியுள்ளது. இதன் மூலம் சிறு பிழைகளுக்காக நிறுவனங்கள் சட்ட சிக்கல்களை சந்திக்க வேண்டிய நிலை குறையும்.
குறைந்தபட்ச வரி சர்ச்சைகளை தவிர்க்க, ₹10,000-க்கு கீழ் உள்ள வரி விவகாரங்களுக்கு நோட்டீஸ் அனுப்புவது நிறுத்தப்பட்டுள்ளது. இது நிறுவனங்களின் சட்ட ரீதியான வேலைப்பளுவை பெருமளவு குறைக்கும்.
நிறுவனங்களின் லாபத்திற்கு கூடுதல் வலு
Input Tax Credit (ITC) வரம்பை விரிவுபடுத்தியதன் மூலம், நிறுவனங்களுக்கு புதிய நிதி நன்மைகள் கிடைக்கவுள்ளது. இனி ஊழியர்களின் காப்பீடு (Health & Life Insurance), டெலிகாம் டவர்கள், பைப்லைன்கள் மற்றும் கேட்டரிங் சேவைகளுக்கும் ITC கோர முடியும். இது ஐடி, மேனுஃபேக்ச்சரிங் மற்றும் நிதிச் சேவை நிறுவனங்களின் நிகர லாபத்தில் (Profit Margins) நல்ல முன்னேற்றத்தை ஏற்படுத்தும்.
லாஜிஸ்டிக்ஸ் மற்றும் இ-காமர்ஸ் துறைக்கு ஜாக்பாட்
பதிவு செய்யப்படாத டெலிவரி பார்ட்னர்கள் மூலம் வழங்கப்படும் டெலிவரி சேவைகளுக்கான GST வரியை 18%-லிருந்து 5%-ஆக குறைத்துள்ளது. இது இ-காமர்ஸ் மற்றும் லாஜிஸ்டிக்ஸ் துறையில் நிலவி வந்த நீண்டகால சிக்கலுக்கு முற்றுப்புள்ளி வைத்துள்ளது.
தற்போது இந்த அறிவிப்புகள் அனைத்தும் அரசு அதிகாரப்பூர்வமான அரசாணையை வெளியிட்ட பிறகுதான் நடைமுறைக்கு வரும் என்பதால், முதலீட்டாளர்கள் அந்த அறிவிப்பிற்காக காத்திருக்கின்றனர்.