Fixed Deposit மெச்சூரிட்டி ஆன பிறகு அதை புதுப்பிக்கவோ அல்லது திரும்ப எடுக்கவோ தவறினால், உங்கள் பணம் குறைவான வட்டி தரும் சேமிப்புக் கணக்கு வட்டிக்கு மாறிவிடும். இது குறித்து ரிசர்வ் வங்கி (RBI) எச்சரித்துள்ளது.
பல முதலீட்டாளர்கள் Fixed Deposits (FD) திட்டங்களில் முதலீடு செய்துவிட்டு, அதை அப்படியே மறந்துவிடுகிறார்கள். மெச்சூரிட்டி தேதி முடிந்த பிறகும், அதே அதிக வட்டி கிடைக்கும் என்று நினைப்பதுதான் பலருக்கு ஏற்படும் பெரிய தவறு. மெச்சூரிட்டி ஆன பிறகு அந்த பணம் வங்கி விதிமுறைப்படி 'Overdue' நிலைக்கு மாறிவிடும்.
வட்டி குறையும் ஆபத்து
Reserve Bank of India (RBI) விதிகள் படி, ஒரு FD மெச்சூரிட்டி ஆன பிறகு, நீங்கள் அதைத் திரும்பப் பெறவோ அல்லது புதுப்பிக்கவோ (Renew) செய்யவில்லை என்றால், அந்த தொகைக்கு இனி நீங்கள் முதலீடு செய்தபோது இருந்த அதிக வட்டி கிடைக்காது. அதற்குப் பதிலாக, அந்த வங்கி வழங்கும் சாதாரண சேமிப்புக் கணக்கு (Savings Account) வட்டி மட்டுமே கிடைக்கும். இது நீண்ட கால அடிப்படையில் உங்கள் முதலீட்டின் லாபத்தை கணிசமாகக் குறைத்துவிடும்.
DEA Fund - கவனிக்க வேண்டிய எச்சரிக்கை
உங்கள் பணம் மெச்சூரிட்டி ஆகி 10 ஆண்டுகள் வரை யாரும் உரிமை கோராமல் இருந்தால், அந்தப் பணம் RBI-ன் Depositor Education and Awareness (DEA) Fund-க்கு மாற்றப்பட்டுவிடும். பணம் கிடைக்காமல் போகாது, ஆனால் அதை மீண்டும் பெறுவதற்கு நீங்கள் வங்கி கிளைக்கு நேரில் சென்று பல ஆவணங்களைச் சமர்ப்பித்து, நீண்ட கால நிர்வாக நடைமுறைகளை (Administrative hurdles) எதிர்கொள்ள வேண்டியிருக்கும்.
தவிர்க்க வேண்டிய வழிகள்
- Auto-Renewal & Auto-Payout: முதலீடு செய்யும்போதே மெச்சூரிட்டி ஆப்ஷன்களைச் சரியாகத் தேர்ந்தெடுக்கவும்.
- தகவல் அப்டேட்: உங்கள் மொபைல் எண் மற்றும் மின்னஞ்சல் முகவரியை வங்கியில் சரியாக அப்டேட் செய்திருந்தால் மட்டுமே, மெச்சூரிட்டி குறித்த நோட்டிபிகேஷன்கள் உங்களுக்குத் தேடி வரும்.
- கால இடைவெளி: அவ்வப்போது உங்கள் மெச்சூரிட்டி தேதிகளைச் சரிபார்ப்பது, உங்கள் பணத்தை அடுத்தகட்ட முதலீட்டிற்கு நகர்த்த உதவியாக இருக்கும்.