நிதியமைச்சர் நிர்மலா சீதாராமன் தலைமையில் நடந்த FSDC கூட்டத்தில், அமெரிக்க கடன் பத்திரங்களின் வட்டி உயர்வு மற்றும் வங்கிகளின் சைபர் பாதுகாப்பு குறித்து முக்கிய ஆலோசனை நடத்தப்பட்டது.
பொருளாதார சவால்கள்
புது தில்லியில் நடைபெற்ற நிதியியல் நிலைத்தன்மை மற்றும் மேம்பாட்டுக் கவுன்சில் (FSDC) கூட்டத்தில், இந்திய நிதிச் சந்தைக்கு ஏற்படக்கூடிய புதிய சவால்கள் குறித்து விவாதிக்கப்பட்டது. குறிப்பாக, அமெரிக்காவின் 10 ஆண்டு கால டிரஷரி பாண்ட் (Treasury Yield) வட்டி விகிதங்கள் 5%-ஐ நெருங்குவது, இந்திய சந்தையிலிருந்து முதலீடுகள் வெளியேற வழிவகுக்கலாம் என கவலை தெரிவிக்கப்பட்டுள்ளது. இது இந்திய ரூபாயின் மதிப்பை பாதிப்பதோடு, உள்நாட்டு சந்தையில் பணப்புழக்கத்தை (Liquidity) குறைக்கும் அபாயத்தையும் கொண்டுள்ளது.
சைபர் பாதுகாப்பு - வங்கிகளுக்கு புதிய கட்டுப்பாடு
டிஜிட்டல் மயமாகி வரும் நிதித்துறையில் சைபர் தாக்குதல்களைத் தடுக்க, புதிய 'நிதித்துறை சைபர் பாதுகாப்பு வியூகத்தை' (Financial Sector Cyber Security Strategy) அரசு அமல்படுத்த உள்ளது. குறிப்பாக, குறைந்த தொழில்நுட்ப வசதிகளைக் கொண்ட பிராந்திய கிராமப்புற வங்கிகளில் (RRBs) பாதுகாப்பு கட்டமைப்பை பலப்படுத்த அரசு அழுத்தம் கொடுக்கிறது. இதற்காக வங்கிகள் தங்களது தொழில்நுட்ப செலவுகளை (Capex) அதிகரிக்க வேண்டிய சூழல் ஏற்பட்டுள்ளது. இது வரவிருக்கும் காலாண்டு முடிவுகளில் வங்கிகளின் இயக்கச் செலவுகளில் (Operating Expenses) பிரதிபலிக்கலாம்.
கோடிக்கணக்கான பணம் மீட்பு
முதலீட்டாளர்கள் கவனிக்க வேண்டிய மற்றுமொரு முக்கிய விஷயம், நீண்ட நாட்களாக உரிமை கோரப்படாமல் உள்ள வைப்புத் தொகைகள், பங்குகள் மற்றும் காப்பீட்டுத் தொகைகளை மீட்பது குறித்த அறிவிப்பு. 'உங்கள் பணம், உங்கள் உரிமை' (Your Money, Your Right) திட்டத்தை விரிவுபடுத்தி, மக்களிடம் சேர வேண்டிய தொகையை விரைந்து வழங்க ரெகுலேட்டர்களுக்கு நிதியமைச்சர் உத்தரவிட்டுள்ளார். எதிர்காலத்தில், இது போன்ற உலகளாவிய மாற்றங்களைச் சமாளிக்க FSDC கூட்டங்களை அடிக்கடி நடத்தவும் திட்டமிடப்பட்டுள்ளது.