மும்பை நுகர்வோர் நீதிமன்றம், ஓய்வூதியதாரர் ஒருவரின் ₹14.06 லட்சம் கிளைம் தொகையை வழங்க தாமதம் செய்த EPFO நிறுவனத்திற்கு, 6% வட்டி வழங்க உத்தரவிட்டுள்ளது.
மும்பை புறநகர் மாவட்ட நுகர்வோர் குறைதீர் ஆணையம், ஓய்வூதியத் தொகை வழங்க தாமதம் செய்ததற்காக EPFO-க்கு எதிராக முக்கிய தீர்ப்பை வழங்கியுள்ளது. ₹14.06 லட்சம் மதிப்பிலான கிளைம் தொகையை வழங்க 35 நாட்கள் தாமதம் செய்ததால், பாதிக்கப்பட்ட ஓய்வூதியதாரருக்கு 6% வருடாந்திர வட்டி வழங்க வேண்டும் என்று ஆணையம் உத்தரவிட்டுள்ளது. விதிகளின்படி, விண்ணப்பம் செய்த 20 நாட்களுக்குள் பணம் வழங்கப்பட வேண்டும் என்பது குறிப்பிடத்தக்கது.
நீதிமன்றத்தின் பார்வை
ஆவணங்கள் சரியாக இல்லை என்று EPFO தரப்பில் கூறப்பட்ட வாதத்தை நீதிமன்றம் ஏற்கவில்லை. இதற்கான முறையான அறிவிப்பையோ அல்லது கடிதத்தையோ EPFO சமர்ப்பிக்கத் தவறியதால், இது சேவையில் குறைபாடு (Deficiency in service) எனத் தீர்ப்பளிக்கப்பட்டது. இந்த உத்தரவை அமல்படுத்த 45 நாட்கள் அவகாசம் வழங்கப்பட்டுள்ளது.
டிஜிட்டல் சீர்திருத்தங்கள்
இந்த சட்ட சிக்கல்களுக்கு மத்தியில், தனது செயல்பாடுகளை எளிமைப்படுத்த EPFO பல்வேறு அதிரடி மாற்றங்களைச் செய்து வருகிறது:
- தொகை வரம்பு உயர்வு: ஆட்டோ-செட்டில்மெண்ட் வரம்பை ₹1 லட்சம் என்பதிலிருந்து ₹5 லட்சமாக உயர்த்தியுள்ளது. இது 3 நாட்களுக்குள் பணத்தை பெற்றுத் தரும்.
- UPI ஒருங்கிணைப்பு: நிதியை நேரடியாக வங்கி கணக்கிற்கு அனுப்பும் வகையில் UPI வசதி விரைவில் கொண்டுவரப்பட உள்ளது.
- வகைப்படுத்துதல்: இதுவரை இருந்த 13 விதமான விதிகள் சுருக்கப்பட்டு, அத்தியாவசிய தேவைகள், வீட்டு வசதி மற்றும் சிறப்புச் சூழ்நிலைகள் என 3 முக்கிய வகைகளாக மாற்றப்பட்டுள்ளன.
இந்த டிஜிட்டல் மாற்றங்கள் மூலம் வரும் காலங்களில் கிளைம் தொடர்பான தாமதங்கள் குறையும் என்று எதிர்பார்க்கப்படுகிறது.