அக்டோபரில் இந்தியாவில் Apple Pay அறிமுகமாகிறது. ஆரம்பகட்டமாக Axis Bank உடன் இணைந்து இந்த சேவை தொடங்கப்படவுள்ளது. UPI ஆதிக்கத்திற்கு மத்தியில் ஆப்பிள் நிறுவனம் எப்படி களம் இறங்குகிறது?
இந்திய டிஜிட்டல் பேமெண்ட் சந்தையில் ஆப்பிள் நிறுவனம் தனது காலடியை எடுத்து வைக்கிறது. அக்டோபரில் தொடங்கப்படவுள்ள இந்த contactless பேமெண்ட் சேவை, ஆரம்பகட்டமாக Axis Bank கிரெடிட் கார்டு வாடிக்கையாளர்களுக்கு மட்டும் கிடைக்கும். இந்தியாவில் கடந்த 2022-ம் ஆண்டிலிருந்து ஆப்பிள் போன்களின் மார்க்கெட் ஷேர் 8% ஆக உயர்ந்துள்ள நிலையில், இந்த நடவடிக்கை மிக முக்கியமானதாக பார்க்கப்படுகிறது.
RBI-ன் புதிய விதிமுறை
இந்த அறிமுகத்திற்கு முக்கிய காரணமாக இருப்பது இந்திய ரிசர்வ் வங்கியின் (RBI) புதிய விதிமுறை மாற்றம்தான். கார்டு பரிவர்த்தனைகளுக்கு பயோமெட்ரிக் அங்கீகாரத்தை RBI அனுமதித்துள்ளதால், Apple Pay-ல் Face ID மற்றும் Touch ID தொழில்நுட்பத்தை பயன்படுத்த வழிவகை செய்யப்பட்டுள்ளது.
UPI-க்கு சவாலா?
இந்தியாவின் டிஜிட்டல் பேமெண்ட் சந்தையில் 84% பங்களிப்பு UPI வசதிக்கே உள்ளது. பெரும்பாலான சிறு மற்றும் பெரு வணிகர்கள் QR கோட் முறையை பயன்படுத்துகின்றனர். ஆனால், Apple Pay-க்கு NFC-enabled பாயிண்ட்-ஆஃப்-சேல் (POS) மெஷின்கள் அவசியம் என்பதால், இது அதன் பயன்பாட்டிற்கு ஒரு தடையாக இருக்கலாம்.
பிற வங்கிகளுடன் பேச்சுவார்த்தை
Axis Bank-ஐ தொடர்ந்து HDFC Bank மற்றும் ICICI Bank போன்ற பெரிய வங்கிகளுடனும் ஆப்பிள் பேச்சுவார்த்தை நடத்தி வருகிறது. இருப்பினும், வர்த்தக ரீதியான கருத்து வேறுபாடுகளால் இந்த பேச்சுவார்த்தைகள் தற்காலிகமாக தேக்கமடைந்துள்ளன. இதனால் இந்தியா முழுவதும் ஒரே நேரத்தில் அனைத்து வங்கிகளிலும் இந்த சேவை கிடைக்காமல், படிப்படியாகவே விரிவுபடுத்தப்படும் என எதிர்பார்க்கப்படுகிறது.