கனடிய வங்கிகளை குறிவைத்து, செயற்கை நுண்ணறிவு (AI) மூலம் போலி அடையாளங்களை உருவாக்கி கடன் மோசடியில் ஈடுபட்ட கும்பலை லாகூர் சைபர் கிரைம் பிரிவு கைது செய்துள்ளது. KYC விதிகளை ஏமாற்றி இந்த கும்பல் பல லட்சம் டாலர் மோசடி செய்துள்ளது.
லாகூரில் உள்ள தேசிய சைபர் கிரைம் புலனாய்வு அமைப்பு (NCCIA) ஒரு சர்வதேச மோசடி கும்பலை அம்பலப்படுத்தியுள்ளது. இந்த கும்பல், செயற்கை நுண்ணறிவைப் பயன்படுத்தி கனடாவின் முன்னணி வங்கிகளை ஏமாற்றி வந்துள்ளது. சுபான் பட், குல்ரேஸ் பட் மற்றும் முகமது நோமன் ஆகிய மூவர் தற்போது கைது செய்யப்பட்டுள்ளனர்.
மோசடி நடந்தது எப்படி?
இந்த கும்பல் 'Synthetic Identity Fraud' என்ற நவீன முறையைப் பயன்படுத்தியது. உண்மையான நபர்களின் தகவல்களையும், ஏஐ மூலம் உருவாக்கப்பட்ட போலி தரவுகளையும் இணைத்து, பார்ப்பதற்கு உண்மையானது போல தோன்றும் டிஜிட்டல் அடையாளங்களை உருவாக்கினார்கள். இதைப் பயன்படுத்தி, வங்கிகளின் KYC (Know Your Customer) விதிமுறைகளை மிக எளிதாகத் தாண்டினார்கள்.
மறைமுக நடவடிக்கைகள்
வங்கிகளின் பாதுகாப்பை ஏமாற்ற, இவர்கள் 'Dolphin Anty' போன்ற பிரத்யேக பிரவுசர்களைப் பயன்படுத்தி தங்கள் டிஜிட்டல் தடயங்களை மறைத்துள்ளனர். போலி கணக்குகளைத் தொடங்கி, கிரெடிட் கார்டுகளைப் பெற்று, கடன் வரம்பை (Credit Limit) முழுமையாகப் பயன்படுத்திய பிறகு, அந்த கணக்குகளை அப்படியே கைவிட்டுவிட்டனர். இதனால் வங்கிகளுக்குப் பெரும் இழப்பு ஏற்பட்டுள்ளது.
டிஜிட்டல் வங்கிக்கு எச்சரிக்கை
தற்போது வங்கிகள் அனைத்தும் 'ரிமோட்' எனப்படும் ஆன்லைன் சேவைகளை ஊக்குவிப்பதால், பழைய பாதுகாப்பு முறைகள் போதிய பலனைத் தருவதில்லை. இந்த சம்பவம், வங்கிகள் இனி கட்டாயம் பயோமெட்ரிக் மற்றும் பிஹேவியரல் அனாலிசிஸ் (Behavioral Analysis) போன்ற நவீன பாதுகாப்பு அம்சங்களுக்கு மாற வேண்டிய அவசியத்தை உணர்த்துகிறது.