இந்தியாவில் Tesla நிறுவனம் தனது Model Y காருக்கான மூன்று நாள் சிறப்பு நிதிச் சலுகையை (financing promotion) தொடங்கியுள்ளது. விளம்பரத்தில் மாதம் ரூ.19,990 என்று கூறப்பட்டாலும், உண்மையான EMI தொகை ரூ.39,990 ஆகும். எரிபொருள் சேமிப்பை கணக்கில் கொண்டு இந்த 'Effective Cost' முறை அறிமுகம் செய்யப்பட்டுள்ளது.
'Switch and Save Carnival' - சிறப்புத் திட்டம்
அக்டோபர் 23 முதல் 25 வரை, டெல்லி, மும்பை, பெங்களூரு, சென்னை, ஹைதராபாத், நொய்டா மற்றும் குருகிராம் ஆகிய நகரங்களில் Tesla தனது 'Switch and Save Carnival' நிகழ்வை நடத்துகிறது. வாடிக்கையாளர்களை கவரும் வகையில் மாதம் ₹19,990 என்ற கவர்ச்சிகரமான தொகையை நிறுவனம் முன்வைத்துள்ளது.
உண்மை நிலவரம் என்ன?
விளம்பரத்தில் சொல்லப்படும் தொகைக்கும், வாடிக்கையாளர் கட்ட வேண்டிய உண்மைத் தொகைக்கும் பெரிய வித்தியாசம் உள்ளது. 7 ஆண்டு தவணைத் திட்டம், 8.5% வட்டி மற்றும் ₹6 லட்சம் முன்பணம் (Down payment) அடிப்படையில் கணக்கிட்டால், உண்மையான மாதத் தவணை ₹39,990 ஆகும். இதிலிருந்து எரிபொருள் மற்றும் பராமரிப்பு செலவில் சேமிக்கப்படும் ₹20,000-ஐ கழித்துவிட்டு, மீதமுள்ள தொகையை 'Effective Cost' என நிறுவனம் குறிப்பிடுகிறது.
சந்தை போட்டி மற்றும் முதலீட்டாளர் பார்வை
இந்தியாவில் Tata Motors மற்றும் Mahindra & Mahindra நிறுவனங்கள் ஏற்கனவே பட்ஜெட் விலை மின்சார வாகனங்களில் ஆதிக்கம் செலுத்துகின்றன. அவற்றுடன் போட்டியிட Tesla இத்தகைய உத்திகளை கையாள்கிறது. ஆனால், இந்த சேமிப்பு கணக்கீடுகள் அனைத்தும் கார் பயன்பாடு மற்றும் மின்சார கட்டணத்தை பொறுத்தே அமையும் என்பதால், வாடிக்கையாளர்கள் இதை எப்படி எதிர்கொள்வார்கள் என்பது முக்கியமானது.
கூடுதல் சலுகையாக, இந்த 3 நாட்களில் முன்பதிவு செய்பவர்களுக்கு உடனடி கார் எக்ஸ்சேஞ்ச் மதிப்பீடு மற்றும் இலவச Wall Connector வழங்கப்படும் என அறிவிக்கப்பட்டுள்ளது. இந்த வியூகம் விற்பனை எண்ணிக்கையை உயர்த்துமா அல்லது சந்தைப் பங்கை அதிகரிக்குமா என்பதை பொறுத்திருந்துதான் பார்க்க வேண்டும்.