JLR சைபர் தாக்குதலும், அசாதாரண செலவுகளும்
இந்த பெரும் நஷ்டத்திற்கு முக்கிய காரணம், ₹1,600 கோடி மதிப்பிலான அசாதாரண செலவுகள் (Exceptional Items). இதில், JLR நிறுவனத்தில் நடந்த சைபர் தாக்குதலை சரிசெய்ய மட்டும் ₹800 கோடி ஒதுக்கப்பட்டுள்ளது. இந்த டிஜிட்டல் தாக்குதலால், ஆடம்பர கார் தயாரிப்பான JLR-ன் உற்பத்தி 5 வார காலத்திற்கு நிறுத்தப்பட்டது. இது ஜூலை-செப்டம்பர் காலாண்டில் JLR-க்கு ஏற்கனவே $228.5 மில்லியன் இழப்பை ஏற்படுத்தியதோடு, £1.5 பில்லியன் மதிப்புள்ள பிரிட்டிஷ் அரசாங்கத்தின் கடன் உத்தரவாதத்தையும் அவசியமாக்கியது. மேலும், புதிய தொழிலாளர் சட்ட விதிகளை அமல்படுத்த ₹400 கோடி மற்றும் முத்திரை வரி (Stamp Duty) செலவுகளுக்காக ₹400 கோடி என கூடுதல் செலவுகள் ஏற்பட்டன. இதனால், நிறுவனத்தின் வரிக்கு முந்தைய லாபம் (Profit Before Tax - PBT) ₹4,700 கோடி நஷ்டத்தில் உள்ளது.
உள்நாட்டு விற்பனை உயர்வு இருந்தும் வருவாய் சரிவு
நிறுவனத்தின் செயல்பாட்டு வருவாய் (Revenue from Operations) கடந்த ஆண்டின் இதே காலாண்டுடன் ஒப்பிடும்போது 25% சரிந்து ₹69,605 கோடியாக குறைந்துள்ளது. இது முந்தைய காலாண்டை விட 23.56% குறைவாகும். இந்த வருவாய் சரிவுக்கு முக்கிய காரணம் JLR-ன் விற்பனை ஆகும். JLR-ன் விற்பனை (சீன கூட்டு நிறுவனம் தவிர்த்து) 43% சரிந்தது. இயல்பு நிலை உற்பத்தி நவம்பர் மாத மத்தியில் தான் மீண்டும் தொடங்கியது. இதற்கு மாறாக, Tata Motors-ன் உள்நாட்டு விற்பனை மற்றும் ஏற்றுமதி 22% உயர்ந்து நிலைமையை ஓரளவு சமாளித்துள்ளது. JLR-ன் செயல்பாட்டு லாபமும் (EBIT margin) கடுமையாக பாதிக்கப்பட்டு, கடந்த ஆண்டு 9% லாபத்தில் இருந்த நிலையில், தற்போது -6.8% நஷ்டத்திற்கு சென்றுள்ளது. வரும் மார்ச் 2026-ல் முடியும் நிதியாண்டிற்கான JLR-ன் EBIT margin கணிப்பை 0% முதல் 2% வரை என குறைத்துள்ளது. அமெரிக்க வரிகள் மற்றும் சைபர் தாக்குதல் போன்ற காரணங்களால் JLR ஏற்கனவே இரண்டு முறை தனது கணிப்புகளை குறைத்திருந்தது என்பது குறிப்பிடத்தக்கது.