2027 நிதியாண்டின் முதல் காலாண்டில் இந்திய ஆட்டோமொபைல் நிறுவனங்கள் சாதனை அளவிலான விற்பனையை பதிவு செய்துள்ளன. ஆனால், கச்சா பொருள் விலை உயர்வு மற்றும் மின்சார வாகன (EV) முதலீடுகளால் நிறுவனங்களின் லாப வரம்பு (Margin) கடும் சரிவை சந்தித்துள்ளது.
இந்திய ஆட்டோமொபைல் துறையில் ஒரு விசித்திரமான சூழல் நிலவுகிறது. ஒருபுறம், 2027 நிதியாண்டின் முதல் காலாண்டில் பயணிகள் வாகன விற்பனை 25.9% உயர்ந்து, 1.27 மில்லியன் யூனிட்களை எட்டியுள்ளது. மறுபுறம், BSE Auto இன்டெக்ஸ் பெரிய முன்னேற்றம் இன்றி தடுமாறி வருகிறது.
லாப வரம்பில் சரிவு
விற்பனை அதிகரித்தாலும், நிறுவனங்களின் லாபம் குறைய முக்கிய காரணம் EBITDA மார்ஜினில் ஏற்பட்டுள்ள 210 அடிப்படை புள்ளிகள் (bps) சரிவுதான். தற்போதைய மார்ஜின் வெறும் 13.1% ஆக உள்ளது. showrooms நிரம்பி வழிந்தாலும், அந்த விற்பனையை லாபமாக மாற்றுவதில் நிறுவனங்கள் சிக்கலை சந்தித்து வருகின்றன.
கச்சா பொருள் விலை மற்றும் சவால்கள்
எஃகு (Steel), அலுமினியம் மற்றும் கச்சா எண்ணெய் சார்ந்த பொருட்களின் விலை உயர்வுதான் இந்த சரிவுக்கு முக்கிய காரணம். மேற்காசியாவில் நிலவும் போர் பதற்றம் காரணமாக சப்ளை செயின் பாதிக்கப்பட்டுள்ளது. கண்காணிப்பு செய்யப்பட்ட 19 ஆட்டோமொபைல் நிறுவனங்களில், 14 நிறுவனங்கள் தங்களின் ஆப்பரேட்டிங் மார்ஜின் குறைந்துள்ளதாக தெரிவித்துள்ளன. தங்களுக்கு ஏற்படும் கூடுதல் செலவுகளை வாடிக்கையாளர்கள் மீது முழுமையாக சுமத்த முடியாமல் நிறுவனங்கள் தவிக்கின்றன.
EV முதலீடுகள் மற்றும் போட்டி
தற்போது அனைத்து நிறுவனங்களும் மின்சார வாகன (EV) கட்டமைப்புக்காக அதிக முதலீடு செய்து வருகின்றன. அதே சமயம், மார்க்கெட் பங்குகளை தக்கவைக்க நிறுவனங்கள் அதிரடி தள்ளுபடிகள் மற்றும் ஆஃபர்களை வழங்கி வருகின்றன. இது குறுகிய கால விற்பனை இலக்கை அடைய உதவினாலும், நிறுவனங்களின் லாபத்தை பெருமளவு குறைத்துவிட்டது.
முதலீட்டாளர்கள் கவனத்திற்கு
இனி வரும் காலங்களில் விற்பனை எண்ணிக்கையை விட, நிறுவனங்கள் லாபத்தை எப்படி மீட்கப்போகின்றன என்பதைத்தான் சந்தை உன்னிப்பாக கவனிக்கும். பண்டிகை காலத்தில் விற்பனை எப்படி இருக்கும், கச்சா பொருள் விலை குறையுமா என்பதுதான் பங்கின் போக்கை தீர்மானிக்கும் முக்கிய காரணிகளாக இருக்கும்.